حسين جعفر يكتب: ساعة الحظر ما تتعوضشي (إبداعات).. ورجعت تقرا الشعر من تاني


ورجعت تقرا الشعر من تاني
تقرا وشوش الخلق ساعة الحظر
تقرا وشوش الصبايا قبل الحظر
ولهفة العطشان
وحرقة السجان إذا آمن
وضحكة المسجون إذا كفّر
الوقت متأخر
والجامعة قفلت بيبانها
والطلبة ع الكورنيش بيتمشوا
من غير ما يتغدوا
أهو بكرة يتعشوا
سوا على سفرة الحلم
وعلى السجاده
العاده ما اتغيرت
ما تقطعوش عاده
رجعنا نقرا الشعر من تاني
نقرا وشوش الخلق سهرانه
شفت الصبايا
حنه حيرانه وجنه منسيه
جيل الرومانسيه ثار على الكلاسييك
اللفظ ده كان شيك
الفعل ده أشيك
يا عم قول رأيك
يا عم ذيع فنّك
وقابلني ف التحرير
نقرا وشوش الناس
ماهيش خرفان
نقرا وشوش الناس
بلا قرنين
بيجزوا صوف الأمير
ويضربوا “الليّه”
ضحكه شقيه طالعه للسامعين
ضحكة” نبيّه” طالعه م الشايفين
“دعوة وليه”
قرت وشوش قبلي
وقالتلي شعري اتبنى
على أساس قبلي
وقالتلي شعري اتزرع
للجاي من بعدي
رجعت تقرا الشعب من تاني

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *