أسرة الباقر تتسلم رسالة منه في سجن العقرب: قلقان عليكم في ظروف كورونا حافظوا على نفسكم زي ما باحافظ على نفسي

كتب – محمود هاشم

نشرت نعمة الباقر زوجة المحامي الحقوقي المحبوس محمد الباقر، رسالة من زوجها المحبوس في سجن “العقرب 2″، تسلمتها شقيقته سارة خلال زيارتها الأخيرة له.

وقال الباقر في رسالته: “أمي وأختي وزوجتي، وحشتوني جدا طمنوني عليكم وعلى صحتكم وظروف حياتكم، أنا قلقان عليكم في ظروف مرض كورونا وانتشاره، خصوصا مع السن الكبير”.

وطمأن الباقر أسرته قائلا: “أنا بخير والحمد لله، وصحتي تمام جدا، وبتغدى كويس من أكل التعيين والكافيتيريا، وباخد الأدوية، والنفسية تمام، تنفصني رؤياكم، وإن شاء الله نعدي المرحلة دي على خير، والوباء كمان ونكون مع بعض قريبا يا رب”.

وأضاف: “ماما صحتها عاملة إيه، بتاخد الأدوية بانتظام، خلوا المتابعة مع الدكتور تليفونيا بس، وسارة تاخد بالها كويس جدا مع التعقيم وهي راجعة البيت من الشغل، وأنتي يا نعمة خلي بالك وخليكي وسط أهلك دايما، ووقفوا الزيارات العائلية”.

وتابع الباقر: “أمي حبيبتي، وأختي السند، وزوجتي حبيبة قلبي ورفيقتي، حضن كبير ليكم، حافظوا على نفسكم زي ما أنا بحافظ على نفسي، لغاية ما الحبسة دي تنتهي، ونرجع لحياتنا الطبيعية تاني، أنا سعيد جدا أني بعت الرسالة ومنتظر رسالتكم”.

وقالت زوجة الباقر إن شقيقته نجحت في إدخال طبلية وأدوية له، وسلمته خطابا من أسرته، مضيفة: “مش متخيلين فرقت في نفسيتنا إزاي وريحت قلبنا شوية، ومحمد طمنا عليه وعلى صحته وبيسلم على كل الناس، زي ما زعلنا مع بعض، قلت نفرح مع بعض، عقبال فتح الزيارة وعقبال إخلاء السبيل”.