ميدو: إمام عاشور تحدث مع مسؤولين في الزمالك بالأمس للعودة للنادي فتحركت لكنني وجدته تعاقد مع الأهلي منذ أربعة أيام.. (فيديو)
أكد أحمد حسام ميدو، نجم الزمالك السابق، أن إمام عاشور، لاعب فريق ميتلاند الدنماركي أنهي كل شئ (تعاقده) مع النادي الأهلي منذ 4 أيام.
وقال ميدو في بث حي عبر حسابه على موقع “إنستجرام”، الثلاثاء، إن “إمام عاشور واحد من أحسن اللاعيبه في مصر وهيكون إضافة فنية كبيرة لأي فريق هينضم له” وأنه “أفضل لاعب مركز 8 في مصر”، لكنه شدد على أن “الزمالك مبيقفش على حد ومبيقفش على لعيب”.
وأضاف ميدو أن تحدث مع إمام هاتفيا صباح يوم الجمعة الماضي، وأن اللاعب أخبره بأنه لا يريد العودة للدنمارك مرة أخرى وأنه يمتلك عروض من داخل وخارج مصر وإذا كان نادي الزمالك يرغب في التعاقد معه عليه التواصل مع نادي ميتلاند، لكنه أكد في الوقت ذاته أنه “أحسن عرض ليه هاخده”.
وتابع ميدو: “قولت له الخناقة دي مش داخلينها إلا لما نتأكد أنك مش عايز تلعب في أي نادي تاني إلا الزمالك.. مد لنا إيديك وشوف احنا هنعمل إيه.. تعالى لنا خطوة، واحنا هنيجي لك عشرة”.
وواصل: “لما اتكلمت مع إمام كنت منتظر الراجل يقولي هبلغ النادي بتاعي ان انا مش هلعب في الزمالك، فوجئت بيه الراجل بيقولي يا كابتن ميدو انا العروض اللي هتجيلي أحسن خادها، فقولت له جود لاك احنا مش هنخش الخناقة دي لأسباب كتير أهمها إن الفلوس دي احنا معندناش الإمكانيات المادية ان احنا ندفعها، ثانيا المدرب طالب من صفقات وأولويات في مراكز تانيه مينفعش إننا نشتغل على مراكز تانيه قبل ما نشتغل على المراكز اللي طالبها أوسوريو”.
وأكمل: “من امبارح العصر إمام عاشور بيعمل حاجه غريبة جدا بيكلم ناس في نادي الزمالك وناس في نادي بيراميدز.. بيقولهم أنا مستعد أجي الزمالك بأي رقم بس أنتو اتحركو، فأنا اتحركت واتأكدت من الدنمارك، إن اللاعب من أربع أيام وقع رسميا في النادي الأهلي.. طيب انت ياعم بتعمل الكلام ده ليه.. مش عارف ليه”.
وأكد ميدو أن “نادي الزمالك مبيقفش على لعيب ونادي الزمالك هيمد إيديه إنه هو يجيبك مرة تانيه لو أنت مديت إيديك، لو أنت قربت خطوة لأن احنا عارفين أنك لاعب كويس، لكن نادي الزمالك محدش يلعب بيه”.
وقال ميدو: “أنا بقولكم إمام عاشور مخلص في النادي الأهلي، وكل الأفلام اللي بيعملها عشان يوصل لجمهور الزمالك أن انا مش انا ده الزمالك معمليش عرض ولا أي حاجه”
وختم قائلا: “بقول لجمهور الزمالك إن المسؤولين عن ملف كرة القدم في نادي الزمالك عارفين همه بيعملوا إيه بخصوص أولويات التعاقدات للموسم القادم وبنوعد جمهور الزمالك إن نادي ازلمالك هيسدد الغرامة اللي عليه لسبورتنج لشبونة عشان نفتح القيد وبنتعهد أمامكم إن اللاعيبة اللي طالبها أوسريو والمراكز اللي طالبها هتكون موجودة في نادي الزمالك قبل انطلاق البطولة العربية”.
يذكر أن الإعلامي الرياضي أحمد شوبير، أكد الأحد الماضي أن إمام عاشور نجم خط وسط الزمالك السابق ولاعب ميتلاند الدنماركي حاليا يقترب من الانضمام إلى صفوف النادي الأهلي بنسبة 99.9%.
وقال شوبير في برنامجه “ملعب أون تايم” على فضائية “أون تايم سبورت”: “إمام عاشور أهلاوي بنسبة 99.9% .. امتى الكلام؟ خلال أيام أو خلال ساعات، الموضوع تقريبا شبنه اتحسم نهائيا”.
وأضاف شوبير أنه “يتم وضع الرتوش الأخيرة لصفقة انضمام إمام عاشور إلى الأهلي”
يذكر أن موقع “ترانسفير ماركت” المعني بانتقالات اللاعبين، أكد أيضا إلى اقتراب إمام عاشور من الانتقال إلى النادي الأهلي، وأشار أنه اقترب بنسبة (91%) من الانتقال إلى القلعة الحمراء. لكن النسبة تراجعت لـ(89%) الثلاثاء.
ويأتي انضمام إمام عاشور للأهلي – حال إتمام الصفقة – بعد ترحيب السويسري مارسيل كولر، المدير الفني للنادي الأهلي، بضم اللاعب للحاجة الفنية له في وسط الملعب، وفقا لتقارير صحفية.
