حريته حقه: مأساة معاق محبوس احتياطيًا من 4 سنوات كسر طرفه الصناعي.. ونداء : لا يستطيع دخول الحمام بمفرده.. ما هو خطره على الدولة

عمرو حشاد: عقبة هايكون غير قادر على أي حركة داخل الزنزانة بمفرده.. إيه اللي ممكن يعمله ؟.. والعوضي يطالب بإخلاء سبيله

العوضي للمسؤولين: أطالب بتوفيرطرف صناعي له واخلاء سبيله وفي الحد الأدنى استبدال الحبس بتدابير احترازية

كتبت: ليلى فريد  

تداول نشطاء على مواقع التواصل الاجتماعي تدوينة للباحث القانوني عمرو حشاد، عن محبوس كسر الصرف الصناعي الخاص به داخل محبسه، ويحتاج لإصلاحه. 

وأثارت التدوين تعطف الكثرين، وسط مطالبات بالإفراج عنه، وتصفية ملف الحبس الاحتياطي المطول. 

ولم يتسن لنا الحصول على رد من وزارة الداخلية ولم يصدر أي تعليق من الوزارة حتى الآن.  

وقال طارق العوضي، عضو لجنة العفو الرئاسة، إنه يطالب بإخلاء سبيله وفي الحد الأدنى، واستبدال الحبس الاحتياطي بإحدى التدابير الاحترازية.  

وذكر حشاد: النهارده صحيت من النوم علي اتصال من أمي منهاره وبتعيط، حد من أهالي الناس اللي مع عقبه في السجن اتصل عليها وقالها إن الطرف الصناعي اللي عقبه بيلبسه عوضًا عن رجله المقطوعة وهو طفل اتكسر في السجن ومحتاجين أمي تقابلهم بره السجن تاخده تعمله صيانه وترجعه تاني (وفي الحقيقه معرفش هايكون فيه تعنت في دخول الطرف الصناعي  كالعاده ولا لأ).  

وتابع: يعني دلوقتي عقبة قاعد في زنزانته من غير طرف صناعي، وأكيد بحكم ظروف الاحتجار السيئة في مصر، هايكون غير قادر إنه يدخل الحمام بمفرده.   

وأضاف: هايكون غير قادر على أي حركة داخل الزنزانة بمفرده، أو ممارسة أي حركة تانية، مش ظروف الاحتجاز السيئة اللي هاتبقي بس جايه عليه، كمان حالته النفسية في الزنزانة هتأثر عليه، محتاج حد عاقل يجاوبني، إيه اللي ممكن شخص عاجز عن الحركة من وهو طفل يعمله أو بيمثل خطر إيه على الدولة.   

وواصل: عقبة محبوس مايقارب من 4 سنيين حبس احتياطي استنفدنا فيهم كل طاقتنا، محتاج حد عاقل يتفاعل مع قضيته ويخلصنا من الكابوس اللي عايشين فيه. 

واختتم: محتاجين منكوا تبطلوا سلطويه قبل ما تتكلموا عن أي حوار وطني او تتكلموا عن أي انفتاح سياسي، محتاجين حد عاقل يجاوبنا شخص ذي ده هيمثل خطر إيه علي الدولة، وليه محبوس بقاله 4 سنيين حبس احتياطي. 

وقال طارق العوضي: السيد رئيس الجمهورية معالي النايب العام السيد وزير الداخلية ،لا يمكن أن نطالب هنا بحقه الطبيعي أن تتكفل ألدولة بتقدم طرف بديل للمحبوس احتياطيًا، ولكنني أطالب بتوفيره له وصدور قرار بإخلاء سبيله وفي الحد الأدنى (وحسب ظروف القضية) استبدال الحبس الاحتياطي بإحدى التدابير الاحترازية. 

ومؤخرًا طالبت أحزاب ومنظمات مجتمع مدني وشخصيات عامة، بإخلاء سبيل جميع المحبوسين على ذمة قضايا سياسية، ووضع حد للحبس الاحتياطي المطول. 

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *