تصريحات السيسي في أسبوع الحرب الأوكرانية.. هاجم الإرهاب والكباب ودافع عن شوقي وانتقد مسؤول غربي لحديثه عن حقوق الإنسان (تفاصيل)
السيسي: مسؤول بلجيكي تحدث معي عن حقوق الإنسان فسألته عن الناتج المحلي لبلده.. الناس خرجت في 2011 لعدم وجود رضا مجتمعي
الرئيس عن إزالة منازل بعض المواطنين: مبنجيش عليك إحنا بنعوضك بسعر مناسب.. واللي معاه فلوس يحطها في البنك هيوفر لك عائد
تراخيص البناء فيها نقاش كتير وبسمع وبشوف تعليقات الناس.. مش هنزايد على بلدنا لا لا
السيسي يرد على انتقادات حقوق الإنسان: مش عارف أعلم مش عارف أعالج مش عارف أشغل.. روحوا المرج والمطرية وشوفوا
بعد 30 عامًا على إنتاجه.. السيسي يهاجم فيلم الإرهاب والكباب: جاب مواطن بيشتكي وخلي البلد خصم
الدول اللي بتقول مبتدوش حقوق للناس حقوق إيه؟ أنا مش لاقي أكل.. علشان أفتح شارع بشيل بالألف بيت وعمارة
عندنا 500 مستشفى وعاوزين نضاعف العدد.. هو أنا مش عاوز أدي الطبيب مرتب كويس؟
شهد الأسبوع الجاري عدة تصريحات للرئيس عبد الفتاح السيسي بالتزامن مع بدء الصراع العسكري في أوكرانيا بعد دخول القوات الروسية للأراضي الأوكرانية، وفيما شغلت الأحداث قادة العالم تحدث عن أمور داخلية بشأن أعمال فنية وأجور الموظفين وانتقاد بعض السلوكيات، وهاجم فيلم الإرهاب والكباب الذي قام ببطولته عادل إمام وكتبه وحيد حامد.
السيسي تحدث، الاثنين الماضي، مجددًا عن الأوضاع في عام 2011(عام ثورة 25 يناير وخلع مبارك)، قائلا: “الناس خرجت ليه في 2011، لأن حالة الرضا المجتمعي مش موجودة، الناس مش راضية، مفيش حاجة مكفية، ومفيش تعليم كويس، وبدل ما نقول إن أداء المواطن بقينا في مواجهة الدولة، نعمل دراما، ومش باخدكم بعيد عن الهدف”.
وتابع خلال إطلاق المشروع القومى لتنمية الأسرة المصرية: “بنتكلم عن الحفاظ على الدولة المصرية وعدم الانزلاق للخراب والدمار، الناس تعبانة وعاوزه تغيير صحيح، بس اتغير إزاي، اللى بنتكلم فيه، بنغير أسباب التردى”.
وكشف السيسي، عن حوار دار بينه وبين أحد المسؤولين في بلجيكا، قائلا: “فى بلجيكا التقيت بالناس وكلمت الدنيا.. أول ملف كنت بتكلم عن ملف حقوق الإنسان لأننا معندناش حاجة مخبينها، عندنا قضية مش معروفة وغير معلومة إلا لبعضنا، من ضمن الحاجات اللى كنت بتكلم مع المسؤول قلتله ليه مسالتنيش عن الناتج المحلى بتاعك كام؟ استغرب يعني وقلتله الناتج المحلى عندك كام قالى 500 مليار والسكان قال 10 ملايين نسمة، قلتله يبقا أنا عاوز دخلى 5 تريليون دولار علشان عندي 100 مليون نسمة، وعلشان أنا معنديش المبلغ ده الناس في مصر مش بتاكل كويس ومبتتعلمش كويس ومبتتعالجش كويس.. أدى حقوق الإنسان اللى أنا أعرفها”.
وتابع السيسي: “قولتله عاوز جامعة تدي تعليم كويس، وعاوز مدرسة تعمل تعليم كويس، ومش الناس تتخانق علشان تغشش ولادها، علشان تقولى أن ابنى معايا شهادة شغله بقى”.
وأضاف: “لولا فضل الله على مصر لكانت البلد ذهبت مع الدول التى تهدمت، بدل ما تجيب فيلم الإرهاب والكباب وتجيب المواطن بيشتكى خلى البلد خصم، مخلاش السلبية خصم، أنت المفروض تخلى السلبية خصم”.
وقال السيسي:”المواطن اللى مبيشتغلش هو اللى خصم، لما حولت البلد لخصم هدوها، ولولا فضل الله علينا وكرمه لكانت البلد دى زى باقى البلاد اللى انتوا شايفنها ما قامتش تاني ولا رجعت تاني خلاص، واللى يروح.. يروح ميرجعش، لكن هو افاض علينا”.
وتابع: “طيب بعد أن أفاض علينا هنفضل زى ما إحنا كده، أقابل ناس في الشارع تقولى أنا زعلانة منك، أقولها ليه تقولى عندي 6 عيال أقولها أعمل إيه؟ بس هما ساعات ميجبوش الحاجات دي في التليفزيون، علشان ميزعلوش يعني، أقولها انتي عندك 6 أقولها أنا عندي 100 مليون”.
كما تحدث السيسي، عن انتقادات بعض الدول لمصر بملف حقوق الإنسان، قائلا: “الدول اللى بتقول مبتدوش حقوق للناس، حقوق إيه؟ أنا مش لاقى أكل، مش لاقي أشغل، مش عارف أسكن روحوا المرج والمطرية والخصوص، لما بمنشى في الشوارع الاقى إيه؟، هي دي بلادنا اللى في رقابتنا يا كل المسؤولين والإعلام والصحة والتعليم والجامع والكنيسة انزلوا شوفوا البلد عاملة إزاى؟”.
وتابع السيسي: “علشان أفتح شارع بشيل بالألف بيت وعمارة علشان الناس تمشى فى حتت ما مبيتمشيش فيها.. أنت جاى تعمل إيه؟.. إيه حكايتك النهاردة، لا والله أنا بقولكوا علشان البلد دي بلدنا”.
وأضاف: “البلد دى بلدنا كلنا، مش بتاعتى أنا بس، وأنا دائما أقول الأمن القومي والأمن القومي والأمن القومي في كل حاجة، الرعاية الصحية أمن قومي، التعليم أمن القومي، والدكتور طارق شوقي، وزير التعليم، خد على دماغه لما مات لما جيه يطور التعليم، انتوا عاوزين تعليم ولا مش عاوزين، لقاءاتنا دي توعية حقيقية لواقعنا، وإحنا مش بنكسف، انتوا قولتوا كلام مرتب هيفهموا ناس كتير، وفيه ناس كتير تانيين ممكن مش يفهموا الكلام، زى معدل النمو وغيره”.
وقال السيسي:”عاوزين نضاعف المستشفيات، عندنا 500 مستشفى، عاوزين ألف مستشفى، طب بكام، أنت كده عملت المكان بس، فين التشغيل والأطباء، الناس تسبلنا فرصة عمل في حتة تانية”.
وأضاف: “الطبيب هو أنا بديلو مرتب كويس؟، هو أنا مش عاوز أديلو مرتب كويس، أنا مش قادر اديلوا مرتب كويس، المدرس.. الدولة أنا مش قادر، وبالتالي التعليم اللى بيخرج جامعات حاسبات وكلية هندسة حاسبات، وعاء فيه 10 آلاف من الطلاب، ونقول نعمل الاختبارات الإلكترونية، وبنك معلومات ونظم معلومات.. علشان تتطور إيه البنية التحتية”.
وبالأمس تحدث السيسي خلال افتتاح مشروعات جديدة، قائلا: “هناك ثقافة يجب تغييرها في التعامل مع البناء، والمواطن من غير ما يقصد يلاقي حتة أرض جنب بيته يبني خلاص”.
وتابع السيسي: “بقولها لكل المصريين وأرجو أنكم تسجلوها كويس وتفكروها فيها كويس، اللى معاه قرشين يروح يبنى أي حاجة، أنا بشوف حجم العمارات وحجم الإشغال اللي فيها، لو معاك قرشين تعالي في العمارة بتاعتك 5-6 أدوار وأنت مش هتسكن فيها، لو أنت معاك فلوس وحطيتها في البنك ده هيوفر لك عائد مناسب، أنت تبني على أرض زراعية أو أرض مش بتاعتك، اللى تبني عليه مش هيجيب حاجة دى ثقافة عندنا، حتى الريف يبنى دور ولا دورين، ومش محتاجه دلوقتي ويحتاجه كمان 15 سنة من أجل أولاده.. لازم نتجاوز النقطة دي، مواطنين وشعب، حجم كبير من المساكن اللى بشوفها على الدائري مش مسكونة مفيش شباك راكب”.
وأضاف السيسي: “حجم التحدي، أكبر من اللى بنفكر فيه، الزملاء اللى بيناقشوا لما بنعمل حاجة زي الدائرى الأوسطي شوف بتخدم كام محافظة.. القاهرة الكبرى والمحافظات القريبة منها”.
وتعليقًا على تعويض المواطنين بعد إزالة منازلهم بهدف إنشاء طريق أو تحسين جودة حياة المنطقة، قال السيسي: “المواطن يعرف إحنا عملنا كده ليه؟ بس مبنجيش عليك إحنا بنعوضك وبسعر مناسب جدا، ومش إحنا اللى بنحدده دي هيئة تقيم المكان يساوي كام بالمتر والغرفة، حتى لو بنفتح طريق أو بنزيل علشان نغير شكل الحياة الموجودة وتحسين الحياة”.
وتابع: ليه إحنا كدولة عملنا اشتراطات البناء دي، وليه واخدين اشتراطات قاسية على المواطنين.
وأضاف: “لو عاوز أفضى علشان أعمل محورين علشان يبقا متنفس للناس.. تراخيص البناء فيها نقاش كتير وبسمع وبشوف تعليقات الناس، مش هنزايد على بلدنا لا لا، وإذا كان الأمر نشرح للناس أكثر”.
وشهد نشاط السيسي تفقد أعمال إنشاء محور حسب الله الكفراوي الذي يربط بين جنوب القاهرة منطقة المعادي، بمناطق واحياء شرق القاهرة والتجمع مروراً بالكباري الجديدة أعلى الطريق الدائري ومحور الشهيد، وصولاً للقاهرة الجديدة عبر محور المشير محمد فهمي.
كما تلقى السيسي اتصالاهاتفياً من الملك عبد الله الثاني بن الحسين، ملك المملكة الأردنية الهاشمية، وناقش معه عدة قضايا.
واجتمع الرئيس برئيس الحكومة ووزير التموين لمتابعة موقف المخزون الاستراتيجي لكافة السلع الغذائية الأساسية للدولة، حيث أكد وزير التموين عدم وجود أي مشكلة في توفير تلك السلع في إطار التوجيهات الرئاسية والتخطيط المسبق للدولة بالحفاظ على استمرارية المخزون الاستراتيجي من تلك السلع لمدة لا تقل عن متوسط ٥ شهور.
وهنأ السيسي المصريين بذكرى الإسراء والمعراج، كما تابع الموقف التنفيذي الخاص بالمدن الرياضية الأولمبية الجديدة على مستوى الجمهورية.
واليوم، الخميس، عقد السيسي اجتماعاً موسعاً عبر الفيديو كونفرانس مع كيرياكوس ميتسوتاكيس، رئيس وزراء اليونان، وذلك بحضور محافظ البنك المركزي، ووزراء الكهرباء والطاقة المتجددة، والخارجية، والبترول والثروة المعدنية، والتخطيط والتنمية الاقتصادية، والتعاون الدولي، فضلاً عن نظرائهم من الجانب اليوناني، إلى جانب رئيس بنك الاستثمار الأوروبي.
وصرح المتحدث الرسمي باسم رئاسة الجمهورية إن المباحثات تطرقت إلى تعزيز العلاقات الثنائية بين البلدين خاصةً في مجال التعاون في قطاع الطاقة، خاصة مشروعات الربط الكهربائي، والغاز، وكذا التعاون في قطاعات تغير المناخ، والتحول الأخضر، والهيدروجين الأخضر والطاقة الشمسية، وذلك في ضوء استضافة مصر للقمة العالمية للمناخ COP27 بشرم الشيخ فى نوفمبر القادم.
