“مش هذاكر ولا هعمل حاجة إلا لما يرجعوا”.. خالد نجل الصحفيين سولافة وحسام لجدته بعد طول حبسهما.. وسولافة: يا ترى خالد كبر يا ماما ؟

والدة سولافة: أول مرة خالد يبكي ويطلب ميعاد محدد لعودتكم.. انتي من بدري قلتليلي ه شهور هم دول كم يوم يا تاتا

تغريد زهران: انا بتكلم عن وجعي ومكسوفه علشان في ناس كتير اوي موجوعين زينا.. نفسي انام من غير خوف وقلق عليكم

كتب- حسين حسنين

طالبت السيدة تغريد زهران، والدة المصورة الصحفية المحبوسة سولافة مجدي، بالإفراج عن ابنتها وزوجها المصور الصحفي حسام الصياد، بعد أكثر من عام و3 أشهر من الحبس الاحتياطي.

وتواجه سولافة وزوجها حسام، اتهامات في القضية رقم 488 لسنة 2019 حصر أمن دولة عليا، والمعروفة إعلاميا باسم “فخ اصياد المعارضين”، حيث تتهمهم النيابة بـ نشر أخبار وبيانات كاذبة، مشاركة جماعة إرهابية، وإساءة استخدام وسائل التواصل الاجتماعي.

وتواجه سولافة العديد من الانتهاكات في محبسها، وهذا ما ذكرته في أخر جلسة تجديد لها، الثلاثاء الماضي، عندما تحدثت أمام القاضي وقالت إنها تتعرض للتنمر والاعتداء إلى جانب تجريدها وزميلاتها المحبوسات.

وكتبت تغريد زهران رسالتها إلى ابنتها قائلة:

عارفه يا سلافه انتي وحسام اد ايه وحشتوني اكيد عارفين وحاسيين.

النهارده خالد وجع قلبي وكان مصر ادعيلوا موعد محدد انتوا راجعين امتى وبقيت عاجزه مش عارفه ارد عليه، قالي انتي من بدري قلتليلي ه شهور ويرجعوا من السفر هم ال ٥ شهور دول كم يوم يا تاتا قلتله مش بعرف احسب قالي انا هحسبهم واعرف فاضلهم اد ايه، ماشي يا لولو احسبهم”.. تعب ونام بعد اسئلته الكتير عنكم واول مره خالد يعيط يا سلافه واول مره يقولي انا مش اذاكر ومش هعمل حاجه الا لما يرجعوا وجعتوا قلبي يا حبيبتي

وانا من امبارح من بعد زيارتي ليكي مش قادره اتنفس تعبانه يا حبيبتي ازاي مش طالع بأيدي آخدك وامشي

ومش قادره اروح لـ حسام و آخده وامشي نفسي اشوفكم مع بعض وينتهي الوجع انا بتكلم عن وجعي ومكسوفه علشان في ناس كتير اوي موجوعين زيي وزي خالد نفسي انام من غير خوف وقلق عليكم ازاي انام وانا عارفه انكم مش مرتاحين وزاي اعيش وانتوا بعاد امبارح لما شفتك

ولأول مره تحكيلي عن وجعك وتسأليني خالد كبر يا ماما اصلي بحلم بيه علطول حاضني كنت جوايه بنهار وحاولت اكون متماسكه

مش عارفه الكابوس ده هينتهي امتى وانا بقالي اكتر من ساعه بقنع خالد انكم راجعين قريب لغايه ما قالي يارب يا تاتا ونام بس انا مش عارفه انام يبنتي وانا عارفه ومتأكده انك مش نايمه ومش مرتاحه في المكان ده

داعيالكم يا حبيبتي كل لحظه ربنا يجمعنا قريب خلوا بالكم من نفسكم علشان خالد