السيسي عن مهاجمة إعلاميين للسعودية: لا نتدخل في وسائل إعلامنا.. ومينفعش نسيء للأشقاء ولا ننسى وقفتهم معنا
لو فيه أزمة أنا أطول لساني وأقول كلام مش مظبوط؟.. ده لا يليق أبدا فين لا تنسوا الفضل بينكم؟
بتابع مواقع التواصل وبشوف إنه ساعات حماس زيادة أو حتى أقول تجاوزات في الكلام
هنمشى وراء بعض المواقع المغرضة اللى عاوزة تعمل فتنة بينا وبين الأشقاء؟.. أقل حاجة نعملها نسكت لو ماقولناش كلام طيب
أرجو ناخد بالنا قوى لو فيه تصريح هنقوله كدولة بشكل رسمي ولو مقولناش ده يبقا الأمور ماشية طيبة
كتبت: ليلى فريد
قال الرئيس عبدالفتاح السيسي، إن “سياسة مصر تتسم بالاعتدال والتوازن والانظباط الشديد تجاه الجميع في الداخل والخارج، بتابع مواقع التواصل وبشوف إنه ساعات حماس زيادة أو حتى أقول تجاوزات في الكلام مش بتكلم عن موضوعات محلية بتكلم عن موضوعات خاصة بعلاقتنا مع أشقائنا وده أمر ننتبه إليه كويس”.
وتابع خلال افتتاح المرحلة الثانية لمصنع سايلو فوودز للصناعات الغذائية بمدينة السادات بمحافظة المنوفية: “أرجو نخلي بالنا بتعكس مدى فهمنا ومدى تقديرنا للعلاقات مع الأشقاء، وبالتالى لما يبقا فيه موضوع يتم تداوله دون أساس وملوش خلفية بنعقد ونتكلم أمور قد لا يكون لها أساس من الصحة طيب ليه؟، هنمشى وراء بعض المواقع المغرضة اللى عاوزة تعمل فتنة بينا وبين الأشقاء أقل حاجة نعملها نسكت إن مكوناش نقول كلام طيب نسكت”.
وأضاف: “حتى وسائل إعلامنا اللى إحنا مش نبتدخل فيها، إحنا مش بنكتب إلا دايما لصالح تحسين ودعم العلاقات مش العكس علاقتنا طيبة بالجميع، وده منهج ماشين بيه مش النهاردة ومنذ توليت المسؤولية ده مسار بننتهجه كدولة حتى فى الأزمات والخلافات الكبيرة”.
وقال السيسي: “إحنا دايما مفيش تصريحات سلبية ومنظبطة جدا وميصحش نسيئ لأشقائنا ومننساش وقفة الأشقاء معانا، لو فيه أزمة أنا أطول لساني وأقول كلام مش مظبوط ده كلام لا يليق ابدا، فين لا تنسوا الفضل بينكم؟، لما نعمل كده كمواقع تواصل وبعض المقالات اللى أشوفها مع أشقائنا في المملكة العربية السعودية أو أي دولة أخرى”.
وتابع: “لا لا إحنا حريصين وده توجه دولة وأرجو كمواطنين ننتبه إن إحنا لا ننساق وراء مواقع تريد الفتنة بيننا وعلاقتنا طيبة بالجميع، وحتي فى أصعب الظروف، ومش عاوز أقول أسماء دول لأن الأمور كلها تجاوزناها وكنت عارف كده ولو كان فيه خلاف مع دولة شقيقة خلال السنين اللى فاتت، كنت عارف إننا هنتجاوزها، حتى الأزمة مع إثيوبيا في سد النهضة بتلاحظوا إننا مابنقولش كلمة واحدة تسيئ”.
وأضاف:: “مكوناش نقول حاجة جيدة منقولش ولو مش هنبنى منهدش أرجو ناخد بالنا قوى وأرجو مواقع التواصل وساعات بلاقي بعض الزملاء في الإعلام لو فيه خط وتصريح هنقوله كدولة بشكل رسمي ولو مقولناش ده يبقا الأمور ماشية طيبة، طيب يبقا نبني ونسئ ولا نحسن ونخلي بالنا يعني”.
وكانت وسائل إعلام هاجمت السعودية ودولاً خليجية مؤخرًا، وفي المقابل خرج إعلاميون خليجيون وشنوا هجومًا على المصريين والنظام الحاكم.
