مها أحمد تهاجم نجمين كبيرين: شاركا في مسلسل كـ«مخدماتيه» لممثلة سنة أولى تمثيل «واديتهم على قفاهم»

هاجمت الفنانة مها أحمد، يوم السبت، نجمين كبيرين – لم تذكر اسمهما – شاركا في عمل درامي، مشيرة إلى أنهما كانا كـ«مخدماتيه» لممثلة «لسه ألف باء تمثيل» وكان تمثيلهما سيء.

وقالت أحمد عبر حسابها الرسمي على موقع فيسبوك: «عوضي على الله دى الجمله اللى دايما بقولها لما اتصدم فاشخاص»، وتابعت موضحة: «الحكايه ياساده نجمين عملوا مسلسل واتنجمت عليهم بنوته لسه الف باء تمثيل واديتهم على قفاهم وركبت عليهم الى ان اصبحت بطلة المسلسل وبطلة الدعايه للمسلسل وهما راضيين رغم ان طول عمرهم مبيعملوش كده مع اى زميله لهم اقربها انا».

وأضافت: «النجم الاولانى بينى وبينه عيش وملح وزماله رشحت فمسلسل بطولته وكان بيقنعنى بدور ولما وافقت بعتولى دور تانى معرفوش دور متعملوش واحده مبتداءه المفروض انه عارف قيمتى الفنيه وعارف انى اضافه له اتهرب منى وموقفش جنبى وباعنى رغم ان الكل عارف انى زى اخته(ندل)».

وتابعت: «اما التانى كان فبداياته يتمنى يسلم عليا ويقولى يااستاذه نزلت من نفسى وقلتله مش هنشتغل مع بعض ماهى الحوجه مره رد وقالى الدور بينادى صاحبه. طبعا محكلكوش قد ايه ندمت نفسى وعشت اسود ايام حياتى عياط واكتئاب. وقلت ( عوضى عليك يارب)».

وواصلت: «تمر الايام والاتنين يعلو ويتجمعوا مع بعض فمسلسل واحد (على عينهم طبعا) ويمثلوا وحش قوى تمثيل الكفار وطلعوا كمان مبيقروش اللى بيمثلوه وربنا يركب عليهم بنوته سنه اولى تمثيل وخبره ويتحول المسلسل والدعايه الدراما كامله لصالحها وهما (مخدماتيه للاستاذه)».

وأختتمت منشورها قائلة: «يمهل ولا يهمل ابدوا من جديد يااوفر تمثيل ياللى مبتقروش ياكمبارس جنب النجمه. نصيحه بلاش تتشطروا على اللى كان بينكم وبينهم عيش وملح بلاش تتشطروا على اساتذتكوا. ( عوضنا على الله ). يارب متحوجنا لحد حتى ولو كان اققرب الناس لينا».

وألمح متابعون للفنانة مها أحمد، عبر التعليقات على منشورها، إلى أن المقصود بكلامها الفنان أحمد السقا والفنان أمير كرارة، أبطال مسلسل «نسل الأغراب» الذي تم عرضه خلال شهر رمضان المنصرم، إلا أن «مها» لم تنفي أو تؤكد ذلك.

يذكر أن مها أحمد ممثلة مصرية من مواليد عام 1974، التحقت بالمعهد العالي للفنون المسرحية، وعملت فى مسلسلات مثل (سوق مجرى العيون) و(حلو الكلام) و(الدبابير) وهى طالبة، ثم قدمت مسرحية (شرم برم).

وقدمت مها أحمد بعد ذلك مسلسلات منها: (الوتد) و(أوبرا عايدة) و(حديث الصباح والمساء) و(ترويض الشرسة) و(أبيض × أبيض) و(القضاء فى الإسلام). واشتركت في العديد من الأفلام السينمائية منها (عبده مواسم) و(لخمة راس) و(الباشا تلميذ).