فيديو| رسالة شاب مصري في إيطاليا: «أبوس إيدكم فكروا شوية احنا بنموت هنا.. استقيموا واقعدوا في البيوت»
كتبت- كريستين صفوان:
تداول مستخدمون على مواقع التواصل الاجتماعي مقطع فيديو لشاب مصري يعيش في إيطاليا، يوجه رسالة للمصريين، يطالبهم فيها بالبقاء في المنزل، ويحذرهم من المصير الذي تواجهه الدولة الأوروبية التي صارت البلد الأكثر تضررا بوباء كورونا المستجد (كوفيد-19) في العالم.
وأشار الشاب في بداية الفيديو إلى تصريحات رئيس وزراء إيطاليا حول صعوبة السيطرة على الموقف؛ قبل أن يوجه حديثه إلى الشباب المصري محذرا من تكرار السيناريو الإيطالي في مصر، قائلا: «انت مش خايف أبوك.. مش خايف على أمك.. المرض ده بيصيب الناس الكبيرة وبرضو بيصيب الشباب الصغيرة اللي مش في دماغها».
وأضاف: «الناس فاكرة مادام شاب صغير يبقى مش هصيبه.. لأ هيصيبك وأنت هتعدي أبوك وهتعدي امك وهتعدي خالتك وهتعدي خالك وهيحصل بلاوي مش هنقدر نسيطر عليها احنا في مصر كتير.. احنا في مصر 100 مليون واحد».
وتابع: «استقيموا أبوس إيديكم.. استقيموا واقعدوا في البيوت.. شهر واحد هتقعدوا في البيت شهر واحد مش هتقعدوا كتير.. اسمعوا الكلام أنا شايف.. أنا عايش في إيطاليا وشايف والله.. والله العظيم تلاته أنا شايف…. شايف كل حاجه وشايف الناس عماله بتموت إزاي هنا.. شايف الناس عماله تموت ازاي.. حرام عليكم.. البهدلة اللي هتبقى فيها مصر انتو مبتحبوش بلدكم مبتحبوش اهلكم».
وواصل قائلا: «أنا بجد أقسم بالله أنا ما بقول كده عشان أنا خايف عليكم وعشان أنا شايف كل حاجه قصادي هنا.. أنا أقسم بالله وحياة ديني وإسلامي ما بنزل من البيت.. أنا مش قادر أحنا بنموت هنا؛ بنموت ما حدش حاسس بينا هنا.. احنا بنموت الناس بيقولولنا لو موتوا مش هنعرف نوديكو فين، مش هنعرف ندفنكم فين.. احنا لو متنا هنا مش هنعرف احنا هندفن فين.. والله العظيم تلاته بيقولولنا كده.. بيقولو مش هتدفنوا.. مش هيعرفو يدفنونا فين».
وختم الشاب رسالته وهو يبكي قائلا للشباب في مصر: «حرام عليكم أبوس أيدكم.. أبوس إيدكم فكروا شوية.. عندكم أباهتكم.. عندكم وأمهاتكم.. عندكم الدنيا كلها حرام عليكم فكرو.. أنتو ليه مش عايزين تفكروا.. إيه اللي انتو بتعملوه في بعضيكم ده ايه اللي انتو بتعملوه ده».
