رسالة من نعمة هشام لزوجها المحامي محمد الباقر في محبسه: على البال دايما ولا تفارقنا.. تماسك وخليك صلب حتى خروجك

الزوجة: كان نفسي نبقى مع بعض والوباء بيكتسح العالم.. فايتك حالة الهلع على مستوى العالم وكمية قلشات المصريين

الرسالة: ربنا يعينك معجزة إنك محافظ على قواك العقلية والله عشان أنت بني آدم جميل جداً

كتب- حسين حسنين

أرسلت نعمة هشام، زوجة المحامي الحقوقي المعتقل محمد الباقر، رسالة إلى زوجها في محبسه، بعد الاستمرار في قرار تعليق الزيارات في السجون حتى نهاية شهر مارس الجاري ضمن إجراءات مواجهة فيروس كورونا.

وتحدث نعمة في رسالتها، عن إحباطها بسبب رفض محاولتها تزويد الباقر بكل إجراءات الوقاية الاحترازية والنظافة خوفا من الإصابة بفيروس كورونا المستجد، فيما رفضت السلطات السماح بدخول ذلك.

نص الرسالة:

رسالة إلى باقر .. لو كان مسموح بجوابات في الأوقات العصيبة الحالية .. كحد أدنى من التواصل الإنساني:

بعد السلام والمحبة والأشواق واحشني جداً جداً جداً جداً .. نفسي جداً أشوفك واسمع صوتك .. واشوف ضحكتك منورة وصوتها مجلجل .. كان نفسي نبقى مع بعض والوباء بيكتسح العالم .. آخر دراما كنت اتوقعها إن كل واحد فينا يبقى معزول عن التاني وما يعرفش أي حاجة عنه ..

كان نفسي اجهزك من مجاميعه جوانتيات وماسكات وترمومترات حرارة واغرقك كحول وكلوركس وفاكهة وخضار وكل حاجة في الكون بتقوي المناعة .. حاولت وفشلت والله.

احنا كويسين الحمد لله وصحتنا كويسة .. والعملية الصغيرة اللي عملتها عدت بسلام الحمد لله .. فايتك حالة الهلع على مستوى العالم وكمية قلشات المصريين .. أنا بشتغل من البيت .. وبابا لسه جزء شغال .. عجلة الرأسمالية الطاحنة منعاه يوقف كله والباقي كله بيشتغل جزئي من البيت .. والعيال قاعدين من المدارس في البيت .. وما ادراك ما قاعدة البيت للعيال بنحاول نستعد لأفلام الرعب بتاعة كورونا لكن من غير ما نعبي عربيات السوبر ماركت والأفلام دي بابا ما كانش عايز نجيب كيس مكرونة واحد حتى ازيد من العادي .. عشان مصلحة الناس والوطن والمثل العليا وكدا القطط كويسين لكن الرمل بدأ ينقص في السوق فربنا يستر .. أصل دي حاجة ما ينفعش نعرف نتصرف فيها

على بالي كل دقيقة في اليوم، كأنك قريني والله بصحى وبنام معاك موضوع “اقعد في البيت” بيخليني افكر اننا كلنا مخنوقين منه، فما بالك أنت بقالك كدا بالشهور، وزيادة على كدا مش بتشوف حد ولا الشمس ولا بتقرأ ولا بتدخل على الانترنت ولا بتتفرج على التليفزيون ولا تسمع الراديو، ولا اكل نظيف من البيت ولا حموم بماية سخنة ولا فنجال قهوة، بجد ربنا يعينك، معجزة إنك محافظ على قواك العقلية والله، عشان إنت بني آدم جميل جداً

كل الناس بتحلم بيك ويبعتولي إنهم حلموا بخروجك .. وهموت واحلم زيهم لكن ولا مرة حلمت بخروجك .. معرفش ده عشان أنا شخصية تشاؤمية ولا ايه التفسير العلمي للموضوع

عايزاك تستثمر وقتك جوا السجن في إنك كل يوم تقعد تفكر ازاي هاسعد مراتي لما اخرج، وهخرجها فين، وهجبلها هدايا ايه، وهفرجها على أفلام ايه، وهطبخلها ايه هيه دي الحاجات المفيدة اللي هتفيدك في مستقبلك

خد بالك من نفسك يا حبي، وتماسك واصمد كدا لحد ما تخرجلي بالسلامة ونحضر نهاية العالم مع بعض

حبيبتك ورفيقتك ومراتك نعمة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *