د. محمد محمود مقبل يكتب عن كورونا ويُجيب على الأسئلة الشائعة للمرضى عن الفيروس

أجاب الدكتور محمد محمود مقبل، استشاري الباطنة والجهاز الهضمي، على الأسئلة الشائعة الخاصة بفيروس كورونا، وطالب المواطنين بالبقاء في المنزل، والالتزام بالتعليمات لتقليل أعداد المصابين بكورونا.

وإلى نص ما كتبه مقبل في حسابه على “فيس بوك”:

يا دكتور أنا سخن وبكح أنا عندى كورونا ؟ أنزل للمستشفى؟ أروح الحميات؟ أنا مرعوب يكون عندى كورونا؟

أسئلة كتير بنسمعها من المرضى اليومين دول، وساعات بيتحول الأمر إلى وسواس أو خوف مرضى وقلق ورعب لا داعى له، وساعات ده بيحمل المستشفيات خصوصا مستشفيات الحميات فوق طاقتها لناس ما عندهاش حاجة.

– الأول نسرد المعلومات التالية وبعدين نتكلم عن مواقف ونجاوب على شوية أسئلة :

كورونا فيروس بيسبب أعراض تنفسية ممكن تبقى أعراض بسيطة زى أى دور برد كحة ناشفة وعطس وممكن ارتفاع فى درجة الحرارة والأعراض دى ممكن تتطور لأعراض تنفسية شديدة، الحقيقة إن الأرقام بتقول بشكل تقريبى إن حوالى 80% من الحالات بتكون بدون أعراض أو بسيطة، الأعراض الشديدة بتكون أكتر فى كبار السن فوق 65 سنة ومرضى السكر والضغط وهبوط عضلة القلب الغير مظبوطين، وده له علاقة بمزيج إن مناعتهم أقل وبطريقة شغل الفيروس نفسه جوه الجسم .

طيب تعالى نطبق ده علينا

لو حد مننا عنده دور برد بسيط ، شوية كحة ، عطس ، رشح ، ارتفاع بسيط فى درجة الحرارة ، ممكن يبقى كورونا وممكن يبقى لا ، طيب يعمل ايه.

بلاش اللى عنده أعراض بسيطة يجرى على الحميات أو المستشفيات لأن ده بيضغط على المستشفيات بشدة فى وقت صعب، والأهم لأن لو كان عنده كورونا فهو بينشره، ولو ما كانش عنده كورونا ممكن ياخده من زيارة المستشفى ونزوله من البيت.

طب الحل إيه، الزم بيتك يا أخى، اعزل نفسك فى البيت، زى أى دور برد، اقعد فى البيت اسبوعين مرتاح ، يفضل فى حجرة لوحدك وما تقربش كتير من الناس اللى فى البيت ( يبقى فيه مسافة مناسبة بينك و بين أفراد عيلتك) ، بلاش بوس وأحضان، اللى بيتعاملوا معاك خصوصا لو كبار سن أو مرضى يخلوا بالهم و يغسلوا ايديهم كويس بالمياه و الصابون بشكل متكرر وتطهر الأسطح اللى حواليك بكلور مخفف، حضرتك بقى ممكن تاخد أدوية عادية زى خافض حرارة زى مادة الباراسيتامول، أى حاجة تقوى المناعة زى فيتامين سى وسوائل كتير وتتغذى كويس وتشرب مياه كويس، ممكن تاخد مضاد حيوى مناسب لو فيه سبب واضح وممكن تستشير طبيبك الخاص فى التليفون (فى العادى مش مسموح للأطباء بكتابة علاج عبر التليفون … لكن الظرف طارئ و لو طبيبك عارفك وعارف تاريخك المرضى ممكن تتواصل معاه).

فيه بعد كده احتمالين : الأول إن الأعراض تفضل بسيطة و تقل مع الوقت زى أى دور برد عادى، برضه تكمل الأسبوعين فى البيت احتياطى عزل اختيارى فى بيتك وحجرتك.

لو الأعراض بتزيد وحرارة مش بتنزل بالخافض أو لو بقى فيه أعراض تنفسية شديدة زى ضيقة نفس قوية ، ساعتها بتروح لأقرب مستشفى حميات عندك لتقييم الحالة عندك .

عايزين الناس تفهم إن مش أى شوية كحة وعطس يجروا على المستشفيات لأنهم كده بيعرضوا نفسهم للعدوى بجد، وبيساعدوا على انتشار الكورونا، تروح للمستشفى لو كنت مخالط لحد كان إيجابى لكورونا أو حد راجع من سفر بالخارج وابتدت تظهر عليك أعراض، أو كنت واحد من الفئة الخطر زى كبار السن ومرضى السكر والضغط والقلب وابتدت تظهر عليك أعراض مقلقة.

ونرجع تانى للنصيحة الأهم

لكل الناس، خليك فى بيتك، بلاش خروج لا داعى له.

كورونا مرض مش مشكلته فى شدة أعراضه، مشكلته الحقيقية فى إنه لو انتشر وبقى فيه وباء وإصابة لحالات كتير فالمستشفيات وأسرة الرعاية لن تكفى، والطاقة الاستيعابية من الأطباء المدربين لن تكفى … علشان كده الأهم هو عدم انتشار المرض وتجحيم عدد الحالات

وده بالبقاء فى البيت، النزول فى أضيق الحدود، الحفاظ على المسافات بينك وبين الآخرين، مافيش تسليم بالأيدى ولا أحضان وقبلات، غسيل الأيدى بشكل متكرر لو أنت فى الشغل وبره البيت أو تطهير الأيدى بالكحول، لو انت فى البيت و مافيش زيارات بتجيلك فمافيش قلق بإذن الله .

ألف سلامة و ربنا يحفظ بلدنا وناسنا ….

د. محمد محمود مقبل

استشارى باطنة وجهاز هضمى.