د. محمد علام نائب مدير مستشفى النجيلة للعزل الصحي يُعلن تعافيه من كورونا: تجربة لا أحب أن يمر بها أحد

عبد الرحمن بدر

أعلن الدكتور محمد علام، نائب مدير مستشفى النجيلة، تعافيه من فيروس كورونا. وقال علام: “الحمد لله خرجنا من المستشفى وفى طريقى لبيتى، تجربة لا أحب أن يمر بها أحد”.
وتابع علام: “التباعد المجتمعى أمان لأهلنا، التوعية هى الحل الوحيد الفعال الالتزام واخذ الموضوع بجدية وعدم الاستهانة بالمرض” .
وأضاف الطبيب الذي غاب عن منزله 3 شهور لعلاج مصابي كورونا: “باعتذر لأى حد كلمنى الأيام اللى فاتت ومعرفتش أرد عليه نفسيتى كانت وحشة، وإن شاء الله أول ما أرجع بيتى هرد على كل الرسائل وكل التليفوناتـ أرجع بس لحضن بناتى أشحن منهم طاقة ونفسيتى تتحسن، شكرا ليكم وآسف بجد لو مردتش على حد” .

تفاصيل تجربته

كان علام قد كتب تفاصيل تجربته مع الإصابة بكورونا قائلا “ناس سالتنى عن الأعراض مبدئيا الأعراض زى ماتكلمت من شهرين، بتختلف من شخص لشخص مينفعش أقول أنا عندى كذا وكذا لأن استجابه جسمى مش زى جسمك لكن هنعتمد على الدراسات اللى اتعملت على الالاف الحالات وشفناها فى الحالات اللى كانت عندنا وللاسف فى نفسنا.

أولا الأعراض:

أشهرها ارتفاع بدرجه الحرارة ودى فى حوالى ٨٠ لـ ٩٠ ٪ من الحالات تستمر لايام وممكن تختفى وترجع تانى

تانى أشهر الاعراض سعال جاف فى حوالى ٦٠٪ من الحالات

وآخر حاجة ألم بالجسم وده فى حوالى ٤٠ لـ ٥٠ ٪ من الحالات

يعنى ممكن الموضوع يبدء بكل الأعراض أو عرض واحد أو حتى دون أعراض نهائى.

بعد كده المرحلة الثانية ضيق بالتنفس وارتفاع فى معدل التنفس وده خلال أسبوع من بداية الأعراض أو أقل حسب مناعة الشخص وده بداية الالتهاب الرئوي ومش بيحصل لكل الحالات ولو محصلش فانت خلاص بتخف

لكن لما بيحصل بيبدء يزيد بسرعه خلال يومين فقط بيكون التهاب رئوى شديد وبيحتاج لجلسات واكسجين وتدخلات أخرى.

وبعد كده بيومين فشل بوظائف التنفس وبتصل للوفاه لو متحسنش.

ده تسلسل المرض طبقا لآخر تحديث للصين على عدد الحالات اللى عندها وكمان CDC وغيرهم فى اجماع على الاعراض دى باختلاف النسب بفروق طفيفه اى اعراض اخرى فهى نادره جدا وتكاد لا تحدث زى الاحتقان بالحلق والرشح واضطرابات المعدة.

ثانيا امتا أروح اكشف ؟؟ لو بدأت ارتفاع درجه الحراره وسعال اروح اكشف هيتعمل تحاليل واشعه وبعض الاسئله عن اماكن تواجدك اخر فتره واختلاطك بمرضي ايجابيين او مشتبه فيهم او دخولك مستشفيات لو حصل ان اى حاجه من دول تخلى الطبيب يشك هيتعملك مسحه لو لا فانت مفيش عندك حاجة.

وارد جدا انك فى اى مرحلة من دول تخف بدون أعراض أو بأعراض بسيطه أو باعراض شديده أو حتى فى مرحله حرجة.

علشان كده المخالطين لحاله ايجابيه بيتقالهم يقعدوا فى البيت لمده ١٤ يوم لو مظهرش اعراض فانت كده اما كان عندك المرض بدون اعراض نهائى وخفيت أو معندكش أصلا.

إنما لو ظهر أعراض حتى لو بسيطة درجة حرارة أو سعال فانت لازم يتعملك مسحه لأن كده أنت مشتبه فيه مش مخالط.

إنما أنا مريت بإيه. فللاسف لانى مدخن على بسيط والحمد لله بطلت لما تعبت فالاعراض كانت شديده شويه وكان فى التهاب رئوى بس بدأ يخف وحاليا ارتفاع بدرجه الحراره متوقع وبخف كلها ايام وابقى سلبى (التدخين مش بيحمى).

مردتش اتصور قبل ماعرف اضحك لانكم عرفتونى متفائل مينفعش تشوفونى متشائم.

وانهى علام تدوينته السابقة التي كتبها قبل إعلان تعافيه قائلا بكم أنتم الوباء هينتهى والله بس ساعدوا بعض والتزموا بتعليمات وزاره الصحة ووعوا اللى مش فاهم.


آخر إحصائية

وفي آخر حصيلة رسمية أعلنت وزارة الصحة والسكان، أمس الأربعاء، أنه تم تسجيل 387 حالة جديدة ثبتت إيجابية تحاليلها معمليًا لفيروس كورونا، بينهم أجنبي، ضمن إجراءات الترصد والتقصي التي تُجريها الوزارة وفقًا لإرشادات منظمة الصحة العالمية، بالإضافة إلى وفاة 17 حالة جديدة.
وأضافت أن جميع الحالات المسجل إيجابيتها للفيروس بمستشفيات العزل والحجر الصحي تخضع للرعاية الطبية، وفقًا لإرشادات منظمة الصحة العالمية.

وأعلنت الوزارة أن إجمالي العدد الذي تم تسجيله في مصر بفيروس كورونا المستجد حتى، الأربعاء، هو 7588 حالة من ضمنهم 1815 حالة تم شفاؤها وخرجت من مستشفيات العزل والحجر الصحي، و469 حالة وفاة.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *