بعد تجديد حبسها 45 يوما| والدة سولافة مجدي: ضيعتوا مستقبل أسرة بحالها وطفل 7 سنين بدون ذنب.. يارب تيجي من عندك

قاعدة استنى من إمبارح حد يقولي خدوا إخلاء وبارتب إزاي آخدهم بحضني من غير ما أعيط.. اللي بفكر فيه دلوقتي خالد ابنهم ذنبه إيه

كتب – أحمد سلامة

أعربت تغريد زهران، والدة الزميلة الصحفية سولافة مجدي، عن حزنها الشديد للقرار الصادر اليوم عن غرفة المشورة بتجديد حبس ابنتها سولافة وزوجها حسام الصيد 45 يومًا على ذمة التحقيقات.

كان المحامي نبيه الجنادي قد قال إن غرفة المشورة بمحكمة الجنايات قررت استمرار حبس سولافة مجدي وإسراء عبد الفتاح وحسام الصياد ومحمد صلاح وعمرو إمام ورضوى محمد 45 يومًا على ذمة التحقيقات.

وقالت تغريد زهران عبر صفحتها على موقع التواصل الاجتماعي “فيس بوك”، “كنت قاعدة استنى من إمبارح حد يقولي إنهم خدوا إخلاء سبيل، وكنت قاعدة برتب للقائهم وإزاي آخدهم بحضني، وقلت لنفسي مش هعيط ولا أنزل دمعة هنسى كل الألم اللي شفته، الألم اللي كان ملازمني طول الشهور اللي فاتت بس الظاهر مكتوب عليا الألم لسه شويه تاني”.

وأضافت “كل اللي بفكر فيه دلوقتي خالد ابنهم، ذنبه إيه من كل اللي بيحصل، هم أذنبوا بإيه علشان بردو كل ده يحصل.. أنا بقيت عاجزة حتى عن التفكير وخايفة تبتدي الدراسة وهم مش موجودين، مين اللي هيبقى الداعم النفسي ليه ذنبه إيه طفل لسه ما تمش سبع سنين خايف من كل حاجه حواليه وتعب من السؤال عنهم، أنا كمان خايفة ومرعوبة من اللي بيحصل، أنا بسأل نفسي دايما هل ممكن أقدر أكمل بالدنيا بالمنظر ده”.

وتابعت “بقيت خايفه على ضياع مستقبل طفل المفروض يبقى مع أمه وأبوه ويحس بالأمان، أنتوا إيه ما بتحسوش لما ضيعتوا مستقبل أسرة بحالها، لما تبعدوا زوج وزوجة عن ابنهم اللي لسه ما تمش سبع سنين، ما تردوا لغاية إمتى هتفضلوا غلاظ القلب ومافيش مشاعر.. يارب تيجي من عندك علشان الحزن تملك مني”.

تجدر الإشارة إلى أن القضية رقم ٤٨٨ لسنة ٢٠١٩ حصر أمن دولة عليا، والمعروفة باسم “فخ اصطياد المعارضين” تضم العديد من أبرز النشطاء والصحفيين، ويواجه المتهمون فيها اتهامات بنشر أخبار وإذاعة أخبار وبيانات كاذبة، إساءة استخدام وسيلة من وسائل التواصل الاجتماعي، ومشاركة جماعة إرهابية مع العلم بأغراضها.