تفاصيل منع أسرة مسيحية من تناول الطعام بمحل كشري في نهار رمضان.. والإدارة: خطأ فرد واعتذرنا.. ومحام يتقدم ببلاغ للنائب العام
سيلفيا بطرس: بنتي بتأكل أول معلقة لقينا واحد من العاملين بيقول ممنوع قبل المغرب قولتله أنا مش صايمة للمغرب والأكل قدامي قالي ده النظام
سمية الخشاب: مش عايزين حد يأكل قبل الفطار اقفلوا محلاتكم.. متفرضوش أي سلوك على غيركم عشان ده أكبر مظاهر التخلف
سمير صبري: مسلك المطعم يهدد أمن واستقرار وسلامة الوطن ويدعو إلى الفتنة الطائفية بين أبناء الوطن الواحد.. والتمس التحقيق في البلاغ
كتب: عبد الرحمن بدر وصحف
اشتكت أسرة مسيحية أحد مطاعم الكشري الشهيرة، واتهمته بمنعها من تناول الطعام داخل أحد فروع سلسلة مطاعمها، ورفضت تقديم وجبة الطعام إلا بعد أذان المغرب، بدورها رفضت إدارة المطعم الاتهامات التي وجهت لها قائلة بأنها غير صحيحة.
وروت سيلفيا بطرس عبر حسابها على (فيس بوك)، تفاصيل الواقع، قائلة: نزلت النهاردة جبت بنتي من الحضانة، بعدما خلصنا بنتي قالت أنا جعانه، وبما اننا صايمين ولقينا محل الكشري فاتح وشغالين قولنا ناكل ونروح، قعدنا وطلبنا وجه الأكل، ويادوب البنت بتاكل أول معلقة لقينا واحد من العاملين جاي بيقول ممنوع الأكل قبل المغرب، قولت له يعني ايه ؟ مش ده مطعم ومفتوح والناس قاعدة، قالي أه الناس تقعد بس محدش يأكل قبل الأذان.
وتابعت: قولتله أنت صايم ومستني الأذان، براحتك أنا مش صايمة للمغرب وقاعدة في مطعم والأكل قدامي إزاي ما كلش، قالي هو ده النظام.. ولقينا واحد تاني جاي غالبا مديره وبيكرر نفس الكلام، إحنا بقى مطلوب مننا نطلع معلقة الأكل من بوء البنت؟ ونقنعها إنها ماتاكلش في المطعم علشان فيه ناس قرروا يفرضوا ده على غيرهم؟.
ورد مطعم الكشري في صفحته على (فيس بوك) قائلا: توضيح هام لعملائنا الكرام بخصوص ما تم اتهامنا، من أمس لليوم وهو اتهام غير صحيح، العميلة المحترمة شرفتنا في فرع سراي القبه الساعة ٥:٥٠م لطلب أوردر تيك أواى ودفعت الحساب للكاشير واستلمت الأوردر.
تابع: العميلة لم تجلس داخل الصالة لأن الصالة مغلقة في هذا الوقت ولم يتم منع العميلة أو الطفلة، وإذا حدث غير ذلك فهو خطأ فرد وليس منظومة، لقد تم التواصل مع العميلة اليوم وتوضيح سوء الفهم وتقبلت الاعتذار.
وعادت سيلفيا لتستنكر بيان المطعم وتنفي عدم جلوسها بالصالة، معلقة: للأسف إدارة المطعم تواصلوا معايا تليفونيا، واعتذوا وطلبوا مننا نروح في أي وقت يعزمونا على أكلة كشري، قولت لهم أنا مش عايزة غير اعتذار رسمي على الصفحة لأن كل الناس متضايقة، اتفاجئت إنهم منزلين بوست وقح بيقولوا إني كدابة، وإن الواقعة محصلتش وإننا ماقعدناش في الصالة أصلا، بيكدبوا ويلاوعوا وأنا معايا سكرين شوت من كل كلامهم اللي بيمسحوه واعتراف منهم إننا قعدنا فعلا وبدأنا ناكل.
وعلقت الفنانة سمية الخشاب على الواقعة، قائلة: “مش عايزين حد يأكل قبل الفطار يبقى تقفلو محلاتكم”.
وكتبت سمية الخشاب تغريدة على (تويتر): “متفرضوش معتقداتكم أو طقوسكم أو أي سلوك على غيركم عشان ده أكبر مظاهر التخلف”.
وتابعت: “لما مطعم يكون فاتح لو أي حد طلب أكل يبقى من حقه يأكل براحته، ما دام بتشتغلوا وبتاخدو مرتب يبقى تعملوا شغلكوا صح مش عشان عارفين أنه رمضان وأنه معظم الناس صايمه يبقى تفرضوا ده علي الناس اللي مش صايمه لمجرد انكم مكسلين تشتغلوا، مش عشان معتقدهم مختلف وبيراعوا يبقى حق مكتسب”.
وأضافت سمية:”مش عايزين حد يأكل قبل الفطار يبقي تقفلوا محلاتكم والناس اللي بتشتغل ومش عايزه تمارس شغلها متاخدش مرتبها وترتاحوا وتريحوا، كفايه ازدواجية بقي والذي منه”.
وفي سياق متصل تقدم سمير صبري، المحامي بالنقض والدستورية العليا، ببلاغ عاجل للنائب العام ونيابة أمن الدولة العليا ضد المحل.
وذكر أنه فوجئ مقدمه بما تم نشرة على مواقع التواصل الاجتماعي “مطعم شهير في القاهرة لمواطنة مسيحية طلبت وجبة: مممنوع قبل الإفطار”.
وتابع: لما كان هذا المسلك من المطعم المذكور يهدد أمن واستقرار وسلامة الوطن ويدعو إلى الفتنة الطائفية بين أبناء الوطن الواحد، مما يحق معه للمبلغ التقدم بهذا البلاغ ملتمسا إصدار الأمر بالتحقيق فيما ورد بهذا البلاغ وتقديم المسؤول عن الواقعة للمحاكمة الجنائية العاجلة.
