السيسي يسأل عن سبب زيادة أسعار الخبز الحر ويرد على صاحب مخبز: أنت مالك بالعالمي هو إحنا زودنا عليكو سعر الدقيق؟

كتبت: ليلى فريد وصحف  

سأل الرئيس عبد الفتاح السيسي مواطنين قال إنه يمتلك فرن، أثناء مروره لمتابعة بعض المشروعات: بتبيع الرغيف بكام؟. 

فرد صاحب المخبز: العيش الحر بنبيعه بنصف جنيه والعادي بشلن، ليرد السيسي: بيتكلف 65 قرشًا يعني بتبيعه بأقل من تمنه؟! وبتعمل كام رغيف في اليوم؟، فأجابه صاحب المخبز: ببيعه بنصف جنيه والله، وبعمل حسب الشغل يعني 15 ألف رغيف في اليوم. 

وسأل السيسي: تفتكر إيه سبب غلاء سعر رغيف العيش الحر؟، ليرد أحد المواطنين: «عشان ارتفاع الأسعار في العالم كله»، فقال السيسي: «هو أنت مالك بالعالمي، هو إحنا زودنا عليكو سعر الدقيق يا أولاد؟»، فأجاب: لا يا ريس. 

وأضاف السيسي: إحنا بندي الدقيق دلوقتي من وزارة التموين بالحصة سواء كان للمدعم أو غير المدعم، يبقى إحنا بناخد الدقيق بثمن إحنا عارفينه، يعني الدقيق الحر اللي بديهولك ده بديهولك بثمن علشان تفضل محافظ على سعر الرغيف الحر. 

وتابع: أكبر دورة ربح هي اليومية، فأنا كل يوم بعمل رغيف بكسب لو بكسب في الرغيف قرش، يبقى أنا الرغيف اللي عملته النهارده خدت قرش واللي عملته بكرة أخدت قرش، فيه ناس تانية بتحط بضاعة بتقعد بالأسبوع والشهر، إنما الخبز الناس كلها بتاخده. 

وقال السيسي: لو أنا النهارده عندي مخبز بيطلع 10 آلاف رغيف وأنا بقولها لكل المصريين، لو أنا النهارده عندي مخبز بعمل 10 آلاف رغيف بكسب في الرغيف ريال (20 قرشا) يبقى هكسب قد إيه 4 آلاف جنيه في اليوم مش بالأسبوع وفيهم كل دورة التشغيل مرتبات الناس وسعر الغاز.