بعد 30 عامًا على إنتاجه.. السيسي يهاجم فيلم الإرهاب والكباب: جاب مواطن بيشتكي وخلي البلد خصم (فيديو)
السيسي: المفروض تخلي السلبية هي الخصم.. لما حولت البلد لخصم في 2011 هدوها
كتب: عبد الرحمن بدر
هاجم الرئيس عبد الفتاح السيسي فيلم الإرهاب والكباب الذي أنتج منذ 30 عامًا، وقال السيسي: “بدل ما تجيب فيلم الإرهاب والكباب وتجيب المواطن بيشتكي خلي البلد خصم، المفروض تخلي السلبية هي الخصم، وتخلي المواطن اللي مش بيشتغل خصم”.
وتابع السيسي خلال إطلاق مشروع تنمية الأسرة المصرية:”المواطن اللى مبيشتغلش هو اللى خصم، لما حولت البلد لخصم في 2011 هدوها، ولولا فضل الله علينا وكرمه لكانت البلد دى زى باقى البلاد اللى انتوا شايفنها ما قامتش تاني ولا رجعت تاني خلاص، واللى يروح.. يروح ميرجعش”.
وتحدث السيسي مجددًا، عن الأوضاع في عام 2011(عام ثورة 25 يناير وخلع مبارك)، قائلا: “الناس خرجت ليه في 2011، لأن حالة الرضا المجتمعي مش موجودة، الناس مش راضية، مفيش حاجة مكفية، ومفيش تعليم كويس، وبدل ما نقول إن أداء المواطن بقينا في مواجهة الدولة، نعمل دراما، ومش باخدكم بعيد عن الهدف”.
وتابع: “بنتكلم عن الحفاظ على الدولة المصرية وعدم الانزلاق للخراب والدمار، الناس تعبانة وعاوزه تغيير صحيح، بس اتغير إزاي، اللى بنتكلم فيه، بنغير أسباب التردى”.
وكشف السيسي، عن حوار دار بينه وبين أحد المسؤولين في بلجيكا، قائلا: “فى بلجيكا التقيت بالناس وكلمت الدنيا.. أول ملف كنت بتكلم عن ملف حقوق الإنسان لأننا معندناش حاجة مخبينها، عندنا قضية مش معروفة وغير معلومة إلا لبعضنا، من ضمن الحاجات اللى كنت بتكلم مع المسؤول قلتله ليه مسالتنيش عن الناتج المحلى بتاعك كام؟ استغرب يعني وقلتله الناتج المحلى عندك كام قالى 500 مليار والسكان قال 10 ملايين نسمة، قلتله يبقا أنا عاوز دخلى 5 تريليون دولار علشان عندي 100 مليون نسمة، وعلشان أنا معنديش المبلغ ده الناس في مصر مش بتاكل كويس ومبتتعلمش كويس ومبتتعالجش كويس.. أدى حقوق الإنسان اللى أنا أعرفها”.
وتابع السيسي: “قولتله عاوز جامعة تدي تعليم كويس، وعاوز مدرسة تعمل تعليم كويس، ومش الناس تتخانق علشان تغشش ولادها، علشان تقولى أن ابنى معايا شهادة شغله بقى”.
