السيسي يُحرج نائبًا بقنا طالبه بمنع خصومات من موظفين وتوفير تذاكر بالقطار للمغتربين: أنا مش بهادي ولا بدي فلوس (فيديو)
كتب: عبد الرحمن بدر
أحرج الرئيس عبدالفتاح السيسي، النائب مصطفى محمود مصطفى، عضو مجلس النواب، عن محافظة قنا، بعد مطالبة الأخير بأن يهادي الرئيس عمال مصانع الأسمنت بجنوب الصعيد، مقابل الخصومات التى تم تطبيقها عليهم، وتوفير تذاكر بالقطارات للموظفين المغتربين.
وتابع: فيه حاجة صغيرة كده للمناطق النائية بالنسبة للتذكرة والوجبة للمواطن والموظف متوسط الدخل، 150 و200 جنيه هيتم خصمها في الشهر ده منه، فإحنا عشمانين في هدية من سيادتك”.
ورد السيسي موجهًا حديثه للنائب:” أنا مش بهادي حد، اسمع الكلام أنا لا أهادي أبدًا، ومبديش فلوس لحد خالص، أنا بعمل شغلي بس ولو عايزين تكرموهم أكرموهم أنتم”.
يذكر أن السيسي زار محافظة قنا، السبت، وافتتح عدة مشروعات بالصعيد.
وقال السيسي، السبت: “أوعوا تفتكروا إن البلد هدفها استجداء ضرائب، حركتنا حركة بناء وليست حركة حساب”.
وتابع: “معندناش مشكلة إن إحنا نعمل والناس تشتغل، التفريق مشكلة عندى، ومحبش أفرق فلوس على الناس، عاوزه يكبر ويثق في نفسه ويكون عنصر داعم للاقتصاد المصرى، مضيفا:”مش عاوز أديله السمكة عاوزه يصطاد”.
ووجه السيسي بتقنين أوضاع المصانع الغير مرخصة، قائلا: “كل يومين أبص الاقى الداخلية ماسكة مصانع بدون ترخيص، بيتعمله قضية، قلت يا جماعة دي ناس حاولت تشتغل حتى لو كانت طريقتهم مش مظبوطة طيب أنا أخليه مظبوط”.
وأضاف السيسي: “أشرعنه وأقنن وضعه، مسكناك غلط تعالى نعمل الصح، لو مسكتوا مجموعة مصانع في القاهرة طيب أقرب منطقة فين؟، أقله تعالى اتحرك واشتغل ووقنن وضعه ومش بنقنن الوضع علشان اخد منه حاجة، واوعا تكون فاكر أن بنتصيد الغلط”.
وتابع: “بطرحه على الناس علشان تسمعنا علشان تعرف أن الحركة بناء مش حساب، القضية أن عاوزك تبقا كبير وحاجة حلوة قوى في مصر، تعالى نشتغل سوا أنا مش باصص على الإيجار ولو عاوزين تخفيض أكتر من كده ماشى”.
وقال السيسي: “بوفر الأرض وارفقها وابنى عليها واديك الترخيص كمان يعنى تلاتة أربع المشوار، طيب أنا أقدر أعمل تاني مجمعات زى دى؟، قوى سهل خالص نقدر نعمل قد ده 10 مرات”.
ووجه السيسي، بمساعدة النماذج الناجحة وغير الناجحة، قائلا:”اللى ينجح أكتر نساعده أكتر.. واللى مينجحش نساعده أيضا، لسه المشوار مخلص، التطوير والتحديث مبينتهيش”.
وأضاف: “فيه الدعم الفني بمدارس ومكاتب استشارية، وموظف من التجارة بالتنسيق مع المحافظة للمجمعات، والمحافظ يقدر ينظم عملية النقل علشان الناس اللى بتفتح تجد وسيلة انتقال كويسة”.
