حملة تطالب بـ #عفو_رئاسي_عن_جمال_عبدالحكيم : كل اللى اتسجنوا فى قضايا تيران وصنافير خرجوا وهو لسه مسجون
كتب – أحمد سلامة
طالب عدد من رواد مواقع التواصل الاجتماعي بإصدار عفو رئاسي عن جمال عبدالحكيم المحبوس منذ ٤ سنوات، وأطلقوا وسم “#عفو_رئاسي_لجمال_عبدالحكيم و#خرجوا_جمال_في_العفو”
وكتب أحد أصدقاء عبدالحكيم في تدوينة “جمال إنسان تقريباً تقابله مرة واحدة فى حياتك ويضرب معاك صحوبية عنده قدرة رهيبه إنه يخليك تحبه بمجرد ما تقعد معاه”.
وأضاف محمد صلاح “شاب زينا مليان حب وحيوية يقلب قعدتك الوحيدة البائسة بقدرة قادر لقعدة مبهجة كلها ضحك وهزار بيحب الحياة جداً ممكن يبذل أى شئ عشان يستمتع بيها بس مش مرفه يعنى تلاقيه بيشتغل عشان يعرف يصرف على نفسه لحد أما ياخد البكالوريوس ويلاقى شغلانة محترمة فجأة كل دة وقف”.
وتابع “أنا مبشوفش جمال من يوم ما اتقبض عليه بقالى ٣سنين ونص أنا اتخرجت واشتغلت واتجوزت وخلفت وجمال فى نفس الفترة قاعد فى السجن يعدى عفو ورا التانى وجمال فى السجن يتعمل نقض ويترفض وجمال برضه فى السجن”.
واستكمل “كل اللى اتسجنوا فى قضايا تخص تيران وصنافير خرجوا وجمال لسة فى السجن.. أنا حياتى بتتطور يوم ورا التانى وجمال صاحبى حياته بتطير يوم ورا التانى”.
وأردف “جمال عبد الحكيم شاب دخل السجن عنده ٢٣ سنه دلوقتي ٢٧، ٤سنين عدوا عليه في السجن ، محكوم عليه ب٥ سنين مش عارف يكمل دراسته لظروف السجن جمال شاب طموح وجدع وبيحب الفن والتصوير جاله انزلاق غضروفي وضغط ومبقاش يتحرك كويس من يوم ما اتقبض عليه ومشفش امه ،لان امه جاتلها جلطه ومشاكل تانيه صحيه جمال رافض نتكلم عنها ،خرجوا جمال يقضي شبابه مع امه ،خرجوا جمال الشاب الجميل يكمل دراسته،فاضل سنه مش هيجري حاجه لو خرج جمال يكون وسطنا نرجع نغنى ونتفرج على ماتشات ونسف ع مسلسلات رمضان زى الأول جمال اتقبض عليه في احداث تيران وصنافير زي شباب كتير خرجت وهو لا”.
