رسالة قوية من المخرجة كاملة أبو ذكري بعد هجوم بيومي فؤاد على محمد سلام في السعودية .. هذا نص ما كتبته  

المخرجة: تعرض عمل اتنفذ في 3 أيام وترقص وتغني وتضحك وتأخد آلاف الدولارات لو ده بتسميه فن فأنا لا يشرفني أكون زميلتك 

لما تعرض التفاهة دي وجارك بيدبحوا أطفاله ونساءه ورجاله وتقولي الفن يبقي ماعنديش كلام أقدر أقوله غير إن الإحساس والفن نعمة  

كتب: عبد الرحمن بدر 

قال المخرجة كاملة أبو ذكري: “الأستاذ الفنان إلي كنت واحده من محبيه لو حضرتك فاكر إنك لما تعمل عمل اتحضر وإتكتب وإتنفذ في تلات أيام”.  

وتابعت في تدوينة على صفحتها على (فيس بوك): “تروح تعرضه وترقص وتغني وتضحك وبعد كده تأخد آلاف الدولارات، لو ده بتسميه فن فأنا لا يشرفني إني أكون زميله لك في هذه المهنة، ولما تكون بتعرض التفاهات دي ده لا يشرف الفن المصري”. 

وأضافت: لما تعرض التفاهة دي وجارك بيدبحوا أطفاله ونساءه ورجاله وتقولي الفن يبقي ماعنديش كلام أقدر أقوله غير إن الإحساس والفن نعمة إنتم آخر ناس تتكلموا عنها”. 

وجاء تعليق كاملة بعدما هاجم الفنان بيومي فؤاد الفنان محمد سلام على خلفية انسحابه من مسرحية “زواج اصطناعي” التي تعرض بالسعودية.  

وفي مقطع فيديو نشره الصحفي خالد فرج ظهر الفنان بيومي فؤاد وهو يتحدث عن موقف الفنان محمد سلام بعد انسحابه من المسرحية قائلا: “من حقك إنك تعتذر عن المسرحية لكن مش من حقك إنك تغلط في فنك، إحنا مبنجيش علشان نضحك حضراتكم، إحنا بنقدم فننا المصري وانتوا بتحترمونا واحنا بنحترمكم جدا جدا”.  

وتابع: “شيء عظيم إن الفنان يبقى ليه جمهور في كل الدول … شيء عظيم إني أخرج أتصور مع شاب سعودي أو سيدة سعودية وهي تعلم إن أنا مصري أنا بشرف بلدي، أنا فنان مصري وليا الشرف”، وصفق الجمهوري السعودي لبيومي فؤاد أكثر منمرة خلال هجومه على سلام.   

وكان الفنان محمد سلام أعلن انسحابه من مسرحية “زواج اصطناعي”، التي انطلقت مطلع الشهر الجاري بسبب أحداث غزة.  

وقال في فيديو له على (فيس بوك): السلام عليكم ورحمة الله إن شاء الله المفروض أسافر الرياض عشان أعرض مسرحية زواج اصطناعي في موسم الرياض والمفروض إنها مسرحية كوميدية وفيها أغاني واستعراضات والمفروض إننا نعرض إن شاء الله يوم 30 أكتوبر.    

وتابع: هنعرض في وسط الأحداث اللي بتحصل في غزة، فأنا مش متخيل إني هروح أعمل مسرحية وأهزر وأرقص وإخواتنا في فلسطين عمالين يتقتلوا ويدبحوا ومفيش حاجة بتحصلهم.    

وأضاف: أنا مش هقدر أسافر طبعًا وليه بقول الكلام ده في آخر لحظة المفروض إني أسافر بكرة إن شاء الله لأني كنت على أمل أن الموسم يتلغي أو يتأجل مثل مهرجانات الجونة والقاهرة أو الموضوع يهدى في فلسطين، ونقدر نعرض لكن مفيش حاجة بتحصل لحد دلوقتي في ناس عمالة تموت ومفيش حاجة بتحصل.    

وواصل: أنا إزاي أروح أعرض وناس بتموت في فلسطين، حاسس لو أنا عملت كده هبقى كأني زي اللي بقتلهم بالظبط، هبقى خذلتهم وهبقى بغني وأرقص، مش في إيدي حاجة أقدر أقدمها، فلما نموت وربنا يسألنا عملت إيه لأخوك في فلسطين أنا هرد أقول إيه؟ هقول في وقت الأحداث في فلسطين أنا كنت بعمل مسرحية كوميدية وبرقص وأغني؟!، فأنا مش هقدر أعمل كده.    

واختتم: كان عندي أمل الموسم يتأجل أو يتلغى، فأنا مش هقدر أشارك في المهرجان ده وحابب أقول إني كنت في مشكلة مش عارف أسافر ولا أعمل إيه؟ والتمثيل هو أكل عيشي، لكن لو مسافرتش هل هموت من الجوع؟ بالتأكيد لا.