هويدا طه تستغيث بوزير الداخلية: ضابط رفع سلاحه في وجه ابني لخلاف مروري وحين اشتكى حبس بتهمة الانضمام لجماعة محظورة.. أرجوك تدخل (فيديو)

هويدا: ابني كان بيخلص أوراق وظيفته الجديدة والضابط كان يرتدي زيا مدنيا.. وبطالب بوضع القضية في حجمها الطبيعي

هويدا باكية: بعتذر للضابط ولمصر كلها.. وبقوله مفيش داعي إنك تحطمه لأنه لم يعرف أنك ضابط

كتب: عبد الرحمن بدر

استغاثت الإعلامية هويدا طه، بوزير الداخلية، للإفراج عن أبنها بعد حبسه على خلفية خلاف مع ضابط شرطة بمشكلة مرورية.

وقالت هويدا في مقطع فيديو بحسابها على (فيس بوك): “يوم التلات ابني كان سايق عربيته على الدائري بيخلص ورق في وظيفته الجديدة، وكان معدي جنبه ميكروباص فيها سواق وواحد جنبه لابس مدني عادي، مين زنق على مين الله أعلم”.

وتابعت: “الراجل اللي لابس مدني رفع سلاح على ابني، ابني دارس بره وما يعرفش القواعد هنا، كل اللي شافه واحد رفع عليه سلاح، فراح صوره، وبعت شكوى لمجلس الوزراء، ومجلس الوزراء قال إن الكلام ده لازم يكون في محضر رسمي، فراح ابني يعمل المحضر في القسم بالتجمع الأول، وبعدين ابني اتصل بي من هناك، وقال هم قالوا لي أنت اشتكيت ووزير الداخلية هيبعت حد يسمعك، وبعدها التليفون اتقفل”.

وأضافت هويدا: رحت لأبني مرة يقولوا مش موجود ومره يقولوا مشي، بعتنا تلغرافات لمجلس الوزراء والرئيس ووزير الداخلية، وعرفنا إن ابني موجود في نيابة الأمن الوطني.

وقالت هويدا طه: “التهم التي تم توجيهها له هي الانضمام لجماعة إرهابية ونشر أخبار كاذبة، وأخد 15 يوم حبس، ومفروض هيستلم شغله الجديد يوم 25”.

وتابعت: بوجه رسالة لمعالي وزير الداخلية، القضية خلاف مروري قضية أبسط من إنها تاخد الجدل ده، وطرف منهم يحطم حياة الطرف التاني، كل اللي طالباه تدخلك عشان تتحط القضية في حجمها الطبيعي.

وأضافت هويدا: “يا معالي الوزير راعي إن ابني هيبدأ وظيفته يوم25، ورسالتي للضابط اللي هو طرف في المشكلة، أنا بقولك ممكن ابني مفهمش إنك ضابط، وشاف سلاح، فطبيعي سلاحه هو (الفيس بوك)، القضية أفل من إنك تهتم بيها، بلاش الإمعان في الخصومة أنا بقولهالك كأم”.

وخاطبت الضابط باكية: “مفيش داعي إنك تحطمه لأنه لم يعرف أنك ضابط، وأنا برجوك تحط الموضوع في حجمه الطبيعي، وأنا بعتذرلك وبعتذر لمصر كلها”.

وقالت هويدا: “عايزه أدخل غيارات وأكل ومواد نظافة لابني، وبعدين أخدوا تيشيرت و200 جنيه بس، أنا بعمل الفيديو ده عشان وزير الداخلية يحط القضية في إطارها الطبيعي اللي هو خلاف مروري بين شابين”.

واختتمت هويدا طه: “يا معالي الوزير من فضلك حط القضية في إطارها القانوني، وحاول إن ابني ياخد إخلاء سبيل قبل يوم 25، أنا بعتذر للضابط، وابني هيبدأ حياته هيبدأ وظيفته الجديدة يوم 25 في الشهر”.