نصائح هامة من منى مينا للمساعدة في مواجهة كورونا: نحتاج للتعامل مع المشكلة بهدوء وحذر وجدية دون تهويل أو تهوين
كتب – عبد الرحمن بدر
قدمت الدكتورة منى مينا، عضوة مجلس نقابة الأطباء السابقة عدة نصائح لمواجهة فيروس كورونا، وأكدت أن كورونا يحتاج منا جميعا للحذر والتضامن والاستماع للنصائح العلمية ومساعدة بعض بقدر الإمكان، وكذلك التعامل مع المشكلة بهدوء وجدية دون تهويل وفزع أوأو تهوين وتسيب .
وإلى نص رسالة منى مينا للمساعدة في التغلب على كورونا:
خلينا نفتكر سوا شوية قواعد بسيطة للحفاظ علينا جميعا.
*خليك في البيت.. لا تخرج إلا في الضرورة
* تجنب الزحام في أي أماكن تسوق أو غيره
*تفادى السلامات والأحضان عند لقاء أصحابك
* حافظ على غسيل اليدين
*تجنب الذهاب للمستشفيات إلا في الضرورة القصوى
*لو أصيبت بمظاهر نزلة برد خفيفة (حرارة 38 فأقل ..دون وجود كحة أو ضيق بالتنفس) فطبعا ده ممكن يكون كورونا وممكن يكون أي فيروس انفلوانزا أخر .. ما تقلقش وتذكر إن 80% من حالات كورونا خفيفة و متوسطة وبتشفى في البيت .. المفروض تستريح ..تعزل نفسك في غرفة مستقلة في البيت لمده 14 يوم .. تشرب سوائل دافئة وماء دافئ كتير جدا بقدر الامكان ..وطبعا طعام صحي وبعد عن التدخين .. كمادات للحرارة وممكن باراسيتامول ومشتقاته .
*لو المظاهر المرضية زادت.. حرارة فوق 38 أو كحة شديدة وضيق في التنفس ..اتصل بـ105 لتوجيهك لأقرب مستشفى صدر أو حميات .. غلط إنك تنزل أي مستشفى بشكل عشوائي وتفضل بتتحول من مستشفى لمستشفى .
*خلينا نفتكر إن الضغط والخطورة على الفرق الطبية حاليا رهيب ..عشان كده أرجوكم بلاش الضغط على المستشفيات في أي حاجة غير ضرورية .
*سمعت عن شوية تصرفات أتمنى أن تكون مجرد ظواهر فردية شاذة.. لأنها “عيب” جدا جدا… عيب جدا التعامل مع أعضاء الفرق الطبية بشكل سئ بإعتبارهم “مصدر عدوى” .. هم خط حمايتك من العدوى .. لو ضغطنا عليهم أكتر من كده و إنهاروا ..سيواجه المصريين العدوى بدون أي خطوط حماية .. محدش بيقولك خد الممرض أو الدكتور اللي ساكن جنبك بالحضن .. ولا قرب منه أصلا .. إحنا بنقول حافظوا على التباعد الاجتماعي .. وإحتفظ بمترعلى الأقل بينك وبين أي حد أصلا.. لكن عيب جدا تتعامل معاه بشكل سئ أو تتطاول عليه عشان بيؤدي دوره إنه يعالج المرضى ..وهو نفسه بيعرض حياته للخطر … وخد بالك لو تعبت لاقدر الله هو اللي ها يعالجك ..
*كورونا تحتاج منا جميعا للحذر .. التضامن .. الاستماع للنصائح العلمية .. مساعدة بعض بقدر الإمكان .. التعامل مع المشكلة بهدوء وجدية دون تهويل وفزع ..أو تهوين وتسيب .
