منى سيف: علاء عبد الفتاح مضرب كليًا عن الطعام.. وقياسات سكره مقلقة جدًا وضروري ياخد محلول جفاف وإلا هيتدهور بسرعة
شقيقة علاء: على مدار الأسبوع اللي فات حاولنا كل يوم ندخل محلول جفاف واترفض.. إحنا مش هنبطل نحاول
كتب – عبد الرحمن بدر
قالت الناشطة منى سيف، شقيقة الناشط السياسي علاء عبد الفتاح، إن شقيقها مضرب كليًا عن الطعام.
وأضافت في تدوينة بحسابها على “فيس بوك”: “ده معناه إنه ما بياخدش أي مصادر للسكر، لا عصاير ولا عسل. فقط مياه ومشروبات سخنة سادة- لو أتاحوها”.
وأضافت: “إحنا متأكدين من ده، أولاً لأن ده نوع الإضراب اللي علاء والعائلة دايما بتلجأ له، ثانيا لأن التقرير الرسمي الملحق بمحضر الاضراب في النيابة بيقول إن قياس سكر الدم لعلاء بتاريخ 18 أبريل كان 54 وإنه رفض تعليق محلول جلوكوز. لو علاء مضرب إضراب جزئي ماكانتش هتبقى دي قراية السكر بتاعته بعد أسبوع من الاضراب!!”.
وتابعت: “أنا ماعنديش فكرة إذا كانت النيابة قصدت تضليل المحامي لما سأل أول مرة، ولا هم نفسهم اختلط عليهم الأمر، عامة أتمنى يبقى الموضوع وضح لهم ولنا ولكم ولإدارة السجن”.
وقالت منى سيف: “الحاجة المهمة جدا بقى هي إن علاء ضروري ياخد محلول جفاف وإلا هيتدهور بسرعة جدا، وإحنا على مدار الأسبوع اللي فات حاولنا كل يوم ندخل محلول جفاف واترفض!!”.
وأضافت: “أنا مش فاهمة خالص المسؤولين عن النوع ده من القرارات بيحاولوا يوصلوا لإيه، بس عامة إحنا مش هنبطل نحاول”.
وتابعت: “بأحمل كل ظابط في سجن شديد الحراسة 2 -على رأسهم ظابط الأمن الوطني (أ.ف) المسؤول عن تكدير المعتقلين هناك- مسؤولية صحة وسلامة علاء وكل المعتقلين معه، رغم إن طبعا المسؤولية الرسمية تقع على مأمور السجن -اللي امتعض ورفض يقولنا اسمه- وعلى رئيس مباحث السجن وعلى النيابة والقضاء المسؤولين عن استمرار حبسه رغم سقوط أمر الحبس”.
وأضافت منى: “حابة كمان أنوه، إن قياسات سكر علاء مقلقة جدا لو قارنتوها بقياسات سكرة وسكر أي حد مننا في الأيام الأولى من إضرابنا السابق، بعد مرور أسبوع كون الأرقام لسة بتتراوح عند الخمسينات وما زادتش معناها إن الجسم لسة ماعملش الـ adjustment المتوقع”.
وقالت شقيقة علاء: “النهاردة، 24 أبريل 2020 اليوم الـ 12 لإضراب علاء الكلي عن الطعام، أفكركم بأن فيه معتقل كمان اتنشر عنه إمبارح مضرب عن الطعام اسمه محمد عماشة، وغالبا فيه معتقلين تانيين ما نعرفش عنهم”.
ولم يتسن لـ”درب” الحصول على تعليق من الداخلية عن تطورات الحالة الصحية لعلاء عبد الفتاح وإضراب سجناء عن الطعام.
