محمد علام نائب مدير مستشفى النجيلة يعلن إصابته بكورونا بعد أكثر من شهرين ونصف في علاج المصابين: البلد هتعدي المحنة
علام: أنا في مرحلة الشفاء التام.. مش بطولة ده شغلي وواجبي فيه دكاترة وتمريض وناس كتير في الخطر ده من أول يوم
عبد الرحمن بدر
أعلن الدكتور محمد علام، نائب مدير مستشفى النجيلة بمطروح، إصابته بفيروس كورونا المستجد، أثناء عمله بالمستشفى. وقال في تدوينة بحسابه على «فيس بوك»، الأربعاء: «للأسف في حاجه مكنتش حابب أتكلم فيها عشان مبقاش سبب ذعر وقلق للناس اللي بطمنهم باستمرار ولأنها حاجة متوقعة لكل طبيب وكل لما الفترة تطول فرصة حدوثها بتزيد لكن في ناس ظلماني ولازم أوضحلهم حاجة مهمة وأنا مش زعلان منهم على فكرة».
يذكر أن محمد علام، تواجد منذ أكثر من شهرين ونصف لعلاج مصابي كورونا في مستشفى النجيلة.
وأضاف: «بس الحمد لله اتشخصت كوفيد إيجابي من يوم ٦-٤، أنا كنت عارف من أول يوم إني معرض لكده وراضي ده شغلى وأنا مش زعلان ولا كنت خايف والحمد لله هتكمل على خير وحالتى اتحسنت كتير، وإن شاء الله قريب اتحول سلبى وأروح، دي الحقيقة اللي كنت مخبيها باختياري أنا اللي طلبت محدش يعرف عشان أهلي ميقلقوش اللي بيعدوا الأيام وهما عارفين اللي أنا فيه وآسف إني اتاخرت كل ده محبتش أعرفهم غير لما أكون بقيت كويس».
وتابع علام: «آسف للناس اللي بطمنها باستمرار إني مقلتلكمش بس إن شاء الله هتعدي التزموا باللي بننصح بيه اللي حصل ده وارد لأي طبيب ولا يلام عليه أحد نهائيا ومش معرض ليه أي واحد ملتزم في بيته أو في الشارع ده بسبب إجراءات طبية معينة وكلنا عارفين الخطر اللي إحنا فيه وراضيين وده حسابه عند ربنا مش عاوزين حساب من بشر فيه ده واجبنا أولا وأخيرا وشرف ما بعده شرف لكل طبيب، بشكر كل زميل ليا دكتور أو تمريض أو عامل وقف جمبي في الظروف دي عمرى ماهنسالكم اللى عملتوه، وبشكر كل واحد كتب كلمه حلوة في حقى على البوستات، أنا آسف كنت بستغلكم إني آخد منكم طاقة إيجابية أعدى بيها الفترة دي والحمد لله كلامكم كان ليه مفعول سحر الدعم النفسي شئ رائع».
وقال نائب مدير مستشفى النجيلة: «المرض حقيقي وأعراضه حقيقيه والناس بتخف حقيقي، رجاء ركزوا فى اللي تقدروا تعملوه وهتعدى، والله العظيم بتعدى لو التزمنا مرحلة الخطر عندي عدت وأنا دلوقت فى مرحلة الشفاء التام وإن شاء الله أيام وأروح بيتي إجازة صغيرة وهتبدأ الخناقة مع زوجتى وأهلى علشان ارجع تاني».
واختتم علام: «توضيح مهم جدا جدا دي مش بطولة ده شغلى وواجبى والله العظيم فيه دكاترة وتمريض وناس كتيير فى الصحة فى الخطر ده من أول يوم وأصابوا اللى حصل وارد بنسبة بسيطة فى العالم كله وحصل لكل أطباء العالم عادى وكل دكاترة مصر ومقدمي الخدمة الصحية مكملين ويقدروا بيكم يعدوا البلد من المحنة دي».
