مبرووووك.. هويدا طه تعلن إخلاء سبيل نجلها: بسام رجع البيت.. ومحمد عبد العزيز: مبروك للأم الصبورة الشجاعة

كتب- فارس فكري

أعلن محمد عبد العزيز المحامي والزميلة الإعلامية هويدا طه إخلاء سبيل بسام رمضان نجل هويدا طه.

وقال عبد العزيز إن نيابة أمن الدولة قررت إخلاء سبيل موكلنا بسام رمضان بضمان محل إقامته في القضية ١٨٦٢ حصر أمن دولة وتم تنفيذ القرار ووصوله منزله بسلام

وأضاف في تدوينه على حسابه على الفيسبوك: الحمد لله إخلاء سبيل موكلي بسام رمضان بضمان محل إقامته من نيابة أمن الدولة، ألف مبروك يا أستاذة هويدا الأم الصبورة والشجاعة.

من ناحيتها نشر الزميلة الإعلامية هويدا طه صورتها مع نجها على حسابها على الفيسبوك وكتبت:  بسام رجع البيت

كانت الإعلامية هويدا طه، قد استغاثت بوزير الداخلية في 17 يوليو الماضي، للإفراج عن أبنها بعد حبسه على خلفية خلاف مع ضابط شرطة بمشكلة مرورية.

وقالت هويدا في مقطع فيديو بحسابها على (فيس بوك): “يوم التلات ابني كان سايق عربيته على الدائري بيخلص ورق في وظيفته الجديدة، وكان معدي جنبه ميكروباص فيها سواق وواحد جنبه لابس مدني عادي، مين زنق على مين الله أعلم”.

وتابعت: “الراجل اللي لابس مدني رفع سلاح على ابني، ابني دارس بره وما يعرفش القواعد هنا، كل اللي شافه واحد رفع عليه سلاح، فراح صوره، وبعت شكوى لمجلس الوزراء، ومجلس الوزراء قال إن الكلام ده لازم يكون في محضر رسمي، فراح ابني يعمل المحضر في القسم بالتجمع الأول، وبعدين ابني اتصل بي من هناك، وقال هم قالوا لي أنت اشتكيت ووزير الداخلية هيبعت حد يسمعك، وبعدها التليفون اتقفل”.

وأضافت هويدا: رحت لأبني مرة يقولوا مش موجود ومره يقولوا مشي، بعتنا تلغرافات لمجلس الوزراء والرئيس ووزير الداخلية، وعرفنا إن ابني موجود في نيابة الأمن الوطني.

وقالت هويدا طه: “التهم التي تم توجيهها له هي الانضمام لجماعة إرهابية ونشر أخبار كاذبة، وأخد 15 يوم حبس، ومفروض هيستلم شغله الجديد يوم 25”.

وتابعت: بوجه رسالة لمعالي وزير الداخلية، القضية خلاف مروري قضية أبسط من إنها تاخد الجدل ده، وطرف منهم يحطم حياة الطرف التاني، كل اللي طالباه تدخلك عشان تتحط القضية في حجمها الطبيعي.

وأضافت هويدا: “يا معالي الوزير راعي إن ابني هيبدأ وظيفته يوم25، ورسالتي للضابط اللي هو طرف في المشكلة، أنا بقولك ممكن ابني مفهمش إنك ضابط، وشاف سلاح، فطبيعي سلاحه هو (الفيس بوك)، القضية أفل من إنك تهتم بيها، بلاش الإمعان في الخصومة أنا بقولهالك كأم”.

وخاطبت الضابط باكية: “مفيش داعي إنك تحطمه لأنه لم يعرف أنك ضابط، وأنا برجوك تحط الموضوع في حجمه الطبيعي، وأنا بعتذرلك وبعتذر لمصر كلها”.

وقالت هويدا: “عايزه أدخل غيارات وأكل ومواد نظافة لابني، وبعدين أخدوا تيشيرت و200 جنيه بس، أنا بعمل الفيديو ده عشان وزير الداخلية يحط القضية في إطارها الطبيعي اللي هو خلاف مروري بين شابين”.

واختتمت هويدا طه: “يا معالي الوزير من فضلك حط القضية في إطارها القانوني، وحاول إن ابني ياخد إخلاء سبيل قبل يوم 25، أنا بعتذر للضابط، وابني هيبدأ حياته هيبدأ وظيفته الجديدة يوم 25 في الشهر”.