عمرو أديب يطالب بحياد الإعلام في انتخابات الرئاسة: صدور صفحات جرائد ومحطات تقول إحنا مع فلان مش هينفع.. والعالم كله بيبص عليك (فيديو)
كتب – أحمد سلامة
طالب الإعلامي عمرو أديب، مقدم برنامج الحكاية، جميع القنوات الفضائية ووسائل الإعلام المملوكة للدولة عبر شركات بالتوقف عن دعم مرشح رئاسي بعينه خلال الانتخابات الرئاسية المقبلة.
وقال أديب، “عندي طلب هيضايق ناس كتير، وأنا واضح أهو، وعلى فكرة أنا في لندن وراجع بكرا أو بعده، أنا لا هربان ولا موقوف.. لازم بعد أسبوع أو اتنين أو تلاتة لازم تتوقف وسائل الإعلام المملوكة للدولة عن تأييد أي مرشح، تغطية أخبار أي مرشح هذا أمر أفهمه، إنما أن تصدر صفحات جرائد ومحطات تقول إحنا مع فلان فمش هينفع.. بصوا يا جماعة الموضوع مش صعب، خلينا نعملها كويس”.
وأضاف “لو سألتني الانتخابات اللي جاية مين هيكسب، هل دا سؤال صعب؟ لغاية النهاردة باللي أنا شايفه قدامي مفيش نِسب قريبة، هي دي الحقيقة، إلا لو ظهر تكتل دعم مرشح واحد، ساعتها ممكن نشوف منافسة.. وإيه العيب في المنافسة؟”.
وتابع “يا جماعة إدونا فرصة إننا نشوف حياة طبيعية، إدونا فرصة إن الأمور تعدي، لكن إحنا فجأة لقينا أسامي منعرفاش وأسامي نعرفها، وناس بتشتغل في مواسم قبل شهرين من الانتخابات، اللي بيشتغل سياسة دا بيشتغل على طول زي ترامب كدا بعد خروجه من البيت الأبيض”.
وأردف “إنت مش محتاج تعمل الكلام دا لأن العالم كله بيبص عليك، أرجع تاني وللأسف استشهد بتركيا وأردوغان، رغم إنه فاز لكن كان فيه حالة من التنافسية وكان في زخم.. الواحد موجود هنا وبيتنفس في الديمقراطية الإنجليزية وبيشوف الناس بتعمل ايه وبتتحرك ازاي، إدوا فرصة إن التجربة تبقى جيدة، إلا إذا قررتوا إنكم (تطربقوها) ولو هتعملوا كدا قولولي، هو في حد عنده نفس يبدأ من أول وجديد”.
