عمرو أديب للمرشحين للرئاسة: هتعمل إيه في أزمة سد النهضة والديون والأسعار ودعم السلع والأجور والحبس الاحتياطي والحريات؟ (فيديو)  

الإعلامي: ما الموقف من الحريات الاقتصادية والسياسية وحرية الرأي للجميع؟..عايز أعرف هتعمل ده إزاي واسمع خطط واضحة 

الرأي يترد عليه برأي ومن حق الناس تتكلم وتقول رأيها.. بعد السوشيال ميديا مفيش شيئ يقدر يتمنع  

انقطاع الكهرباء لا يتم وفقا لجدول المواعيد المعلن مسبقا بخصوص توقيتات تخفيف الأحمال.. ومدة الانقطاع أصبحت ساعتين  

كتب: عبد الرحمن بدر 

وجه الإعلامي عمرو أديب عدة أسئلة لمن ينوون الترشح للانتخابات الرئاسية المقبلة.  

وقال أديب خلال برنامجه «الحكاية» على قناة mbc) مصر(: “محتاج أعرف المرشح لرئاسة الجمهورية هيعمل إيه سد النهضة، اللي واقفين فيه في حيطة سد، ماذا ستفعل في الديون؟، هتسدد 165 مليار دولار ديون إزاي؟. 

وتابع: “الدولار وسعر النقد الأجنبي، هل تسيب الدولار ثابت أمام الجنية ولا هتثبته؟، الدعم السلعي هل هتبقي عليه ولا هترفعه؟، بيع الأصول، هل هتبيع ولا لا؟، والأسعار هل هتزيد لا لا؟، والأجور هتزيد ولا لا”.  

وأضاف: “موقفك إيه من الحبس الاحتياطي، هل هتغير القانون ولا هيفضل زي ما هو؟، ما الموقف من الحريات اقتصادية وسياسية وحرية الرأي للجميع؟، أنا عايز أعرف هتعمل ده إزاي، واسمع خطط واضحة، وهتجيب منين؟”. 

وقال أديب: “إحنا كمواطنين من حقنا نعرف، الناس اللي داخلة انتخابات بيكون عندها برامج انتخابية، الرأي يترد عليه برأي، إيه الفكرة إن أي حد يتكلم في السياسة يتقبض عليه، الظروف خلصت، ومصر تعيش الآن الأمن والاستقرار أنت مش عندك مشكلة يكون فيه مشكلة في الرأي، المسألة دي لازم خلاص، من حق الناس تتكلم وتقول رأيها، وبعد السوشيال ميديا مفيش شيئ يقدر يتمنع”. 

وقال أديب إن انقطاع الكهرباء لا يتم وفقا لجدول المواعيد المعلن مسبقا بخصوص توقيتات تخفيف الأحمال في المحافظات، كما أن مدة الانقطاع أصبحت ساعتين وليس ساعة واحدة. 

وأضاف أن الجمعة 15 سبتمبر هو اليوم الذي حدّدته الحكومة بأنه لن يتم تخفيف الأحمال بعده. 

وأكد أن أزمة الكهرباء سببها مشكلة اقتصادية وليست فنية، موضحا أن لديها محطات كهرباء متميزة لكن لا يتوفر مازوت بشكل كاف. 

وتابع: أنا من الناس اللي بيتقطع عندها النور لمدة ساعتين وفي عز الحر.. أنا مش بطلب حاجة زيادة.. عاوزين حد يقولنا إيه الحكاية، وإيه الموضوع. 

وتساءل أديب، عما كان انقطاع الكهرباء سيستمر خلال الفترة المقبلة، وليس له علاقة بارتفاع درجات الحرارة، داعيا الحكومة لإطلاع المواطنين على طبيعة الوضع، وما إذا كان تخفيف الأحمال سيستمر لفترة مقبلة. 

وأضاف: حاجة تضايق طبعا، إحنا داخلين على مدارس، ولازم الناس تعرف علشان اللي بيركبوا أسانسيرات.. أنا مش بطلب حاجة زيادة.