حملة سخرية من “تجمعات ومسيرات مواجهة كورونا”: هو طلع احتلال مش فيروس.. ياريت الموضوع يفضل بينا
تعليق : “الكحول اللي خلص من الصيدليات مكنش بيتعقم بيه كان بيتشرب يا حكومة.. وآخر: ربع ساعة كمان وكلنا نخلص
كتب – باسل باشا
تداول نشطاء على مواقع التواصل الاجتماعي تعليقات ساخرة من خروج العشرات في ساعة متأخرة من مساء أمس، مطلقين تكبيرات للدعوة إلى منع تفشي وباء كورونا المستجد، بعدما تحول للدعاء الجماعي من شرفات المنازل إلى مسيرات بالشوارع، خاصة في محافظة الإسكندرية، على الرغم من التحذيرات من انتشار الفيروس في التجمعات.
وقال شريف علي راضي: “بيحرقوا علم كورونا في محطة الرمل”، مضيفا: “سقوط عشرات الفيروسات من الضحك”، وشارك نادر بدر هتافات ساخرة منها: “ياللي ساكت ساكت ليه جبت كحولك ولا إيه”، وكتب آخرون: “ثورة ثورة حتى المصل”.
وقال أحد النشطاء: “إحنا نطلع في البلكونات ندعي ربنا يرفع عننا الوباء، وبعدين ننزل الشارع ننشره تاني”، كما سخر آدم ألكسندر من المظاهرات قائلا: “أختي الصغيرة صحيت من النوم على صوت التكبير وبتعيط علشان مجابتش لبس العيد”، وكتب محمد سلمان: “اشتباكات بين مؤيدين ومعارضين للفيروس”.
ومن ضمن التعليقات الساخرة من تجمعات محاربة كورونا: “الكحول اللي خلص من الصيدليات مكنش بيتعقم بيه كان بيتشرب يا حكومة”، وتساءلت تقى رمضان: “لا ثانية كده هي كورونا طلعت احتلال مش فيروس”، وأشارت دانيا حمدي إلى أنباء عن سقوط أول فيروس وباقي 18.
وقال آخر ساخرا مما تم: “فيروس إيه اللي ندعي عليه في البلكونات، أنزل له في نص الشارع عرفه مقامه”، ورد آخر: ” يعني ميمشيش معاك أني فيروس خطير ممكن اتنقل وسط التجمعات، لا أنت شيطان وهتتحرق دلوقتي، الله أكبر”، و”سنحاربه بنقل العدوى”.
وتوقع محمود مشالي: “شوية كده هيقتحموا الحجر الصحي ويخرجوا كل المحجوزين هناك”، وعلق أحمد القفاص، قائلا: “أول مرة أعرف البحر بيضحك ليه”.
واستنكر آخرون طريقة تعامل المواطنين مع الفيروس، وقالوا متهكمين: “كورونا يستجيب لمطالب المتظاهرين، اطلع بينا على الصين تاني يا خوليو”، و”في ظل هذه الظروف العصيبة قرر الكوفيد 19 كورونا تخليه عن الانتشار بمصر، وكلف دور الإنفلونزا العادي بإدارة صدور البلاد”.
وحذر البعض من خطورة التجمعات في نشر العدوى بالفيروس، وتأثيرها على جهود احتوائه، حيث قال عبدالرحمن علاء: “يا ريت الموضوع يفضل بيننا وميطلعش للعالم علشان حقيقي هنتهان”.
وقال حسن ممدوح: “حاولوا تاخدوا الموضوع بضحك علشان احتمال تبقى آخر مرة نضحك فيها”، وأطلق أحمد سعيد دعوة ساخرة للخروج في مظاهرات كورونا، قائلا: “نطلع الجمعة اللي جاية مليونية بعد الصلاة ونسميها جمعة الخلاص، وتبقى خلاص فعلا ” ليرد عليه آخر صح “بالوتيرة دي كلنا هنخلص في ربع ساعة”.
