حسين جعفر يكتب : إوعى كورونا (ابداعات)
اوعى الوعي يقرب منك
اوعى كورونا
اوعى العو
اوعى” السوسو”
اوعى السَوْ
اوعى العوا.. شيعه وسنه
كل ديانه
دينكو ودينّا
بلدك ولدك.. كله بلدنا
ايوا بلدنا.. مش بلد اهلك
اوعى الوعي.. يجيك ويهفك
اوعى العو
اوعى كورونا تقرب منك
انسى البوس واللوز والبندق
أوعى الفسدق
والذي منه والذي منك
اوعى الفسَدَه
اوعى المرَدَه
عالم مرضى.. كدّب ـ صدّق
اوعى تحقق
اوعى الوعي يقرب منك
اوعى كورووووناااا
اوعى الوعي يقرب منك
خطره كبير قوي ع اللي ف سنك
واللي ف حارتك واللي ف حيّك
أي جماد ولّا حمار زيك
اوعى تنهق
اوعى تزيّج
اوعى تنونو
اوعى تهوهو
اوعى البطن العفشه تزقزق
عاللي جابونا
اوعى الوعي.. اوعى كورووونااا
اوعى جنيهك يدخل جيبك
قدري نصيبي اوعى يصيبك
اسخن
اعرق
كح تراب
اوعى تهوب يم الباب
حسك عينك
هاشرب دمك ثم هاسيبك
ثم هلبّك:
اوعى الوعى يقرّب منك
اوعى كوروناااااااااا
