تجديد حبس صيادي مطوبس 45 يومًا.. وذويهم: الناس دي أبرياء وشبابهم راح في الحبس.. تعبنا ومش لاقيين حد يسمعنا ارحمونا يرحمكم الله
كتب – أحمد سلامة
أكد عدد من أهالي وأسر صيادي مطوبس (كفر الشيخ) المحبوسين احتياطيا، أنه تم التجديد لهم لمدة 45 يومًا بعد أن قضوا في الحبس سنتين وسبعة أشهر.
وقال أهالي الصيادين المحبوسين لـ”درب”، السبت، “إحنا بنسأل لحد إمتى الناس دي هتفضل محبوسة، لحد إمتى الظلم دا، لحد إمتى هنفضل في القضية دي.. محدش من ولادنا بيخرج وعيالهم اتشردوا، مش عارفين نصرف عليهم في الغلاء دا”.
وأضافوا “المتهمين شبابهم راح ما بين الجدران بدون وجه حق، الستات هتعمل ايه وسط ارتفاع الأسعار والبطالة، اللي عندها طفلين وتلاتة وخمسة هتصرف عليهم منين، ومصدر رزقها ودخل بيتها محبوس في السجن”.
وتابعوا “إحنا معندناش لا شركات ولا مصانع، إحنا معندناش غير الشاب اللي مرمي في السجن، هو العائل الوحيد لأسرة مكونة من أطفال وأم وأب وزوجة، إحنا تعبنا ومش لاقين حد يسمعنا نروح لمين فوضنا الأمر للى لا بيغفل ولا بينام، لله الأمر من قبل ومن بعد”.
وقالت والدة أحد الصيادين المحبوسين “الناس دى تجاوزت مده الحبس الاحتياطي، الناس دي مش إرهابين، إحنا من قرية بسيطة، ومهنة الصيد دي مهنة ورثوها أبًا عن جد، ولا نعرف حاجة غير البحر والسمك ولا نعرف أي حاجة عن الإرهاب”.
واستكملت “نطالب بإخلاء سبيل ولادنا، إحنا بنموت من غيرهم، الناس دي فيهم العاجز وفيهم مريض الضغط وفيهم مريض السكر وفيهم اللي عنده انزلاق غضروفي من اللي كانوا بيشوفه في البحر، كانوا بيتعرضوا للموت في اليوم عشرين مره علشان يأكلوا أولادهم من الحلال، الناس دي أبرياء.. ارحمونا يرحمكم الله”.
وكانت “درب” قد نشرت مقطع فيديو لأهالي صيادين مطوبس المحبوسين، أطلقوا فيه استغاثات لرئيس الجمهورية وجميع المسئولين مطالبين بالإفراج عن ذويهم الذين ألقي القبض عليهم أثناء عودتهم من العمل في ليبيا.
ويقبع 31 صيادًا من محافظة كفر الشيخ في الحبس منذ 2020 باتهامات قيل إنها تتعلق بـ”الانضمام لجماعة إرهابية” دون أن تتم محاكمتهم.
وقالت إحدى زوجات الصيادين في استغاثتها التي وجهتها عبر “درب” موجهة حديثها إلى رئيس الجمهورية “من فضلك يا سيادة الريس احنا ملناش حد غيره، وأنا يا سيادة الريس باستغيث بيك، إحنا والله العظيم ما لنا حد يصرف علينا، والله العظيم محتاجين له، وأنا لا بروح له زيارة ولا بشوفه، دور علينا يا سيادة الريس وانجدنا من اللي احنا فيه”.
فيما تحدثت إحدى الأمهات عن ابنها الغائب “أكتر من 30 صياد كانوا في شغلهم، طالعين ورا أكل عيشهم، الناس دي عيالهم مش لاقيين قوت يومهم.. ولادنا كانوا راجعين من ليبيا عن طريق البر أخدوهم من السلوم على سجن طرة، ومعرفناش مكانهم غير بعد 3 شهور، العيال اتشردوا وولادهم اتشردوا من الجوع ومن غياب الأب.. والله العظيم اللي بقوله أقل من الحقيقة”.
أهالي المحبوسين وجهوا نداءً إلى رئيس الجمهورية طالبوا فيه بالإفراج عن ذويهم المحبوسين منذ أكثر من عامين، إحدى الرسائل التي حصلت عليها “درب” جاء فيه “تحية طيبة واحتراما، حيث أن زوجي متهم في القضية رقم ٦٦٢/ ٢٠٢٠ حصر تحقيق أمن دولة عليا منذ يوم ( 24/6/2020)و حيث أن تلك القضية لم يتم التصرف فيها حتى تاريخ اليوم منذ ذلك التاريخ ولم يتم إخلاء سبيل أي من المتهمين، وبالسؤال من جانب الأساتذة المحامين طوال تلك الفترة حصلنا على وعد من السادة رؤساء النيابة بسرعة التصرف فيها ولكن للأسف لم يتم صدور أي قرار فيها حتى تاريخه، و حيث أن زوجى و باقى المتهمين كلهم كانوا خارج البلاد أثناء فترة التحريات كونهم صيادين من محافظة كفرالشيخ و يعملون فى الصيد البحري و هذه هى مهنتهم و آباءهم وأجدادهم، و كلهم تقريبًا من بلدة واحدة و للأسف امتلأت بيوت القرية بالحزن على ذويهم وأصبحت الزوجات شبه أرامل و الأطفال كالأيتام والأمهات ثكالى والآباء محزنون فكل متهم مسؤول عن أسرته وأبيه وأمه و منهم من يرعى أبناء اخوتهم الأيتام و مع طول فترة الحبس الاحتياطي لهم أوشكت البيوت على الخراب لا قدر الله و كفى ما عانوه و قاسوه من وجع البعاد عن الأهل، بالإضافة إلى أن من بين المتهمين من يعانون من أمراضا مزمنة”.
وتضيف الرسالة “لذلك نلتمس من معاليكم إصدار قراركم الكريم باخلاء سبيل المتهمين في القضية المذكورة بأي ضمان ترونه معاليكم بعد الرجوع لأوراق القضية حرصا على مصالح الأسر التي انهكها وأتعبها طول فترة حبس أبناءهم دون محاكمة”.
”درب” تواصلت مع والدة أحد المتهمين، حيث قالت “ولادنا محبوسين وبيتجدد لهم 45 يوم في كل مرة، إحنا تعبنا بصراحة، لو في أي حل فإحنا مستعدين له، الناس محبوسين من شهر 6 / 2020، كدا كفاية”.وتضيف “ولادنا شغالين صيادين ومش بيشتغلوا في أي حاجة تانية، ولا لهم علاقة بالسياسة، ومنهم اللي لا بيعرف يقرأ أو يكتب أساسا، اتقبض عليهم لأنهم كانوا بيمشوا في البحر، شغالين على مركب له ترخيص ليبي، واشتغلوا في الصيد هناك وبعد رجعوهم اتقبض عليهم، المشكلة إنهم متقابضش عليهم دفعة واحدة، لأنهم مرجعوش مع بعض، في منهم اللي اتقبض عليه وهو راجع طيران وفي اللي اتقبض عليه وهو راجع بري واللي اتقبض عليه وهو راجع بالمركب.. وكمان في اللي اتاخد من بيته”.
وتستكمل “القضية فيها ناس اتقبض عليهم وهم راجعين من فرنسا وناس راجعين من إيطاليا، لحد دلوقتي سنتين و 6 شهور القضية مش بتتحرك ولا حد من المحبوسين بيخرج”.
