السيناريست مريم ناعوم تكتب عن أزمة ريش: الفن سلاحنا الحقيقي.. تحية لمن يملكون الشغف والجرأة للخروج برة الصندوق
مريم: تأليب الرأي العام على صناع العمل مسيء لسمعة مصر.. إحنا دولة فيها نسبة فقر عالية واللي مايشوفش من الغربال يبقى أعمى
السيناريست: أتمنى المؤسسات لا تنجر لمعركة وهمية ولانسمع قرارات تخص المهرجان أو الفيلم أو صناعه مبنية على ضغط رأي غير واعي
الكاتبة: من قدموا بلاغات للنائب العام عاملين زي الشاهد الزور.. يا رب زيح عن البلد دي عمى القلب والبصيرة
كتب: عبد الرحمن بدر
علقت الكاتبة والسيناريست مريم ناعوم على أزمة فيلم ريش بمهرجان الجونة، مؤكدة أن الفن سلاحنا الحقيقي، ووجهت التحية لمن وصفتهم بمن يملكون الشغف والجرأة للخروج برة الصندوق.
وقالت مريم: “خلص المهرجان والواحد ممكن يتكلم بهدوء ويلحق يفكر ويرتب أفكاره، مصر فيها ١٠٠ مليون (إن مكنش أكتر)، نسبة الموهوبين فيهم كبيرة جدا جدا جدا، محتاجين مئات الأكاديميات الفنية وعشرات المهرجانات لأن الفن هو سلاحنا الحقيقي، مش بس ضد أفكار ظلامية رجعية جابتنا ورا وعطلت مصر سنين، لكن كمان عشان نقدر نعبر عن نفسنا ونعيد التفكير في مسلمات عفى عليها الزمن ونخلق جدل مجتمعي صحي.. والأهم عشان الفن وسيلة تواصل عالمية بتحطنا على الخريطة الإنسانية.. مش بس الخريطة الجغرافية”.
وتابعت في تدوينة لها: “البلد الكبيرة قوي دي.. الجميلة قوي دي.. المتنوعة قوي دي فيها فقر، ده أمر واقع، وده لا يسيء لا للبلد ولا للمصريين، لما نتهم فيلم قدم رؤية فنية شديدة الخصوصية إنه مسيء لسمعة مصر عشان قدم الفقر بطريقة تعجبنا أو ماتعجبناش، يبقى كإننا بنقول إن الفقراء بيسيئوا لسمعة مصر، وده شيء بعيدا عن كونه غير حقيقي وغير منطقي.. بس هو كمان غير إنساني”.
وأضاف مريم: “أه.. إحنا دولة فيها نسبة فقر عالية جداً، واللي مايشوفش من الغربال يبقى أعمى.. بس بالرغم من كدة المصريين بيعافروا.. وده شيء يدعو للفخر مش العكس، ولو البلد دي بالرغم من كل التحديات المادية والمعنوية قادرة إنها تصدر الفنانيين والرياضيين والعلماء للعالم.. فده شيء يدعو لفخر أكبر”.
وقالت السيناريست المعروفة: “المزايدة على الدولة وإحراج المؤسسات ودفعهم دفعاً إنهم ياخدوا قرارات ضد حرية الإبداع هو اللي مسيء لسمعة مصر، والضغط الإعلامي الفاشي لدرجة وضع واحد من مهرجاناتنا اللي يتعدوا على الصوابع على المحك هو اللي مسيء لسمعة مصر”.
وتابعت: “تقليب الرأي العام على مخرج ومنتجين العمل واتهامهم اتهامات خالية من الصحة بل وساذجة هو اللي مسيء لسمعة مصر، وضع سينمائيين وفنانين مصر تحت التهديد المعنوي إن أي حد هيفكر برة الصندوق يبقى ضد بلده هو اللي مسيء لسمعة مصر”.
وأضافت مريم: “مصر دي اللي كل فنون وعلوم العالم اعتمدت على حضارتها مش محتاجة حد يدافع عنها ضد فنانينها، ولا يزايد عليهم.. في أعداء آخرين حقيقين محتاجين ده”.
وقالت مريم: “أتمنى مؤسسات الدولة ماتستسلمش ولا تتجر للمعركة الوهمية دي، أتمنى مانشوفش ولا نسمع عن أي قرارات تخص المهرجان أو الفيلم أو صناعه مبنية على ضغط رأي عام غير واعي وغير مدرك لتابعات أي قرارات إنفعالية ممكن تتاخد تحت الضغط، واللي قدموا بلاغات للنائب العام عاملين زي الشاهد الزور، الشاهد اللي ماشافش حاجة”.
واختتمت مريم ناعوم: “تحية للفنون وللسينما المصرية.. تحية للصناع اللي عندهم الشغف والجرأة للتجريب والخروج برة الصندوق.. تحية لمهرجاناتنا السينمائية اللي محتاجة دعم السينمائيين والمؤسسات المعنية، يا رب زيح عن البلد دي عمى القلب والبصيرة”.
يذكر أنه قعت أزمة بمهرجان الجونة السينمائي الذي اختتم فعالياته بالأمس في البحر الأحمر، خلال عرض الفيلم الحائز على الجائزة الكبرى لمسابقة أسبوع النقاد بمهرجان (كان) السينمائي الدولي، لتناول الفيلم معاناة الفقراء في مصر، حيث انسحب عدد من الفنانين من العرض، معتبرين أن الفيلم يقدم صورة غير حقيقة، فيما أكد نقاد أن صورة الوطن لا يمكن اختزالها في مجموعة مشاهد.
ويعد فيلم “ريش” للمخراج عمر الزهيري، وراء تتويج السينما المصرية للمرة الأولى في تاريخها بجائزة من مهرجان “كان” عن عمل فني محدد.
وبعد نحو ساعة من عرض الفيلم، بدأ البعض في المغادرة، والمفارقة أن من غادروا هم من صناع السينما.
وغادر العرض الفنان شريف منير، وظهر غاضبا للغاية، وتبعه الفنان أحمد رزق، ومن خلفه الفنان أشرف عبد الباقي، كما غادر قاعة العرض المخرج عمر عبدالعزيز. وكانت وجهة نظرهم أن الفيلم يحوي مشاهد لا تظهر الصورة الحقيقية لمصر، وبعد أيام خرج عبد الباقي بتصريح، أكد فيه أنه لم ينسحب ولكن خرج لارتباطه بموعد.
يذكر أنه استطاع فيلم ريش السينمائي انتزاع جائزة نجمة الجونة لأفضل فيلم عربي طويل، خلال حفل الختام الذي أقيم مساء الجمعة.
