السيسي ينتقد نوعية البرامج المقدمة في الإعلام: كل القنوات جايبه مطابخ.. إحنا مستنيين حد يعلمنا نأكل؟
كل هدفكم إن الأولاد يبقوا معاهم شهادات وبعدين ميبقاش ليهم فرص عمل.. التعليم مبيحققش المطلوب
كتبت: ليلى فريد
انتقد السيسي الإعلام في عدم الاهتمام في البرامج التي تعلم الأجيال، وقال السيسي: بشوف مثلا بنبقا أحيانا مقصرين في الإعلان مش الدعاية، ولكن إزاى أسوق الكلام المهم للدولة، شوفت مثلا برنامج إسمه (الدوم)، لما البرنامج اشتغل اده فرصة كبيرة لمهارات شباب وشابات مصر في كل مناحى مصر، أتاحنا لهم منصة، والكلام ده أتاح شكل من اشكال التسويق للفكرة.
وتابع في افتتاح عدد من المشروعات الرقمية: مقدرش أعمل برنامج زى ده للموضوع ده، مجبش الولاد والشباب والبنات اللى تميزوا في هذا الأمر، والقي الضوء عليهم علشان أخلى النشء اللى طالع يبقا عنده الحلم ده، المقارنة دايما بتبين حالة المستوى.
وأضاف السيسي: المصريون مهتمون جدا بالتعليم، الأسر اللى بتاخد ولادها في الدروس اللى بتديلهالها ده بيعكس وعى مصري مجتمعي بالتعليم، عايزك تهتم بس في الاستهداف بدل ما فقط عاوز تركز مع الطلبة على انه ياخد شهادة، التليفزيون كوسيلة فيه برنامج اسمه العباقرة استطاع خلال سنوات قليلة يلقي الضوء على حاجة معينة.
وتابع: لقيت كل القنوات جايبه مطابخ.. هتزعلوا مني ولا إيه؟!، طيب هاتولنا الحاجات دي، انتوا بتتكلموا على الأكل؟!، إحنا مستنيين حد يعلمنا نأكل.
وطالب السيسي بتغيير ثقافة التعليم، قائلا: هنشوف في الفترة التانية مجموعة من الشباب في أعلى مستوى ده بنستهدفه، لكن وإحنا رايحين في التعليم ده اللى بنتكلم فيه، ثقافة التعليم اللي إحنا ماشين بيها وليس مناهج التعليم محتاجة تطوير وتعديل.
وأضاف: كل هدفكم إن الأولاد يبقوا معاهم شهادات وبعدين ميبقاش ليهم فرص عمل، الجميع عليه مسؤولية، الإعلام والحكومة والأسر، علشان نبقا فاهمين إن نبقا عندنا فرص حقيقة وماشيين فى مسار، لكن التعليم مبيحققش المطلوب.
