السيسي: من حق الناس تعترض لكن بشرط إن يكون الشخص فاهم بيقول إيه.. و والله اللي بذلته الحكومة معتبر وعظيم

السيسي: بتحملوا نفسكم وأولادكم والدولة فوق طاقتها وبالتالي تثوروا وتخرجوا للشوارع وتهدوا بلدكم

كتب – أحمد سلامة

قال عبدالفتاح السيسي، رئيس الجمهورية، إن المعارضة هدفها تحسين حياة المواطنين ومن حق الجميع أن يعترض ولكن بشرط “إن الشخص دا يكون فاهم بيقول إيه”.

جاء ذلك خلال افتتاح السيسي، صباح الثلاثاء، المجمع الطبي المتكامل بمحافظة الإسماعيلية، وذلك ضمن عدد من المشروعات سيتم افتتاحها في قطاع الصحة.

وتابع السيسي، خلال كلمته، «استوقفتني جملة حقوق الإنسان أن المسار السياسي مش هو فقط الحقوق، أيوة من حق الناس إنها تعبر عن رأيها، من حق الناس تعترض ويكون في معارضة ولكن الهدف منه سواء التعبير عن الرأي أو المعارضة السياسية هو تحسين أحوال الناس، وتحسين حياتهم، هذا الهدف، مش المعارضة للمعارضة ولا للناس تتكلم، لا بتتكلم علشان نقول إن فيه مشكلة وهذا نقبله، ولكن بشرط أن يكون الشخص فاهم بيقول إيه، أنا بتوقف عند هذه الكلمة كثيراً، لأن الدولة المصرية تكون جادة وأمينة ومخلصة في مواجهة تحدياتها هيخفف العبء كثيراً على الرأي والمعارضة».

واستكمل السيسي أن مصر لم تصل لمعدلات خفض الزيادة السكانية المطلوبة، وأشار إلى أن الزيادة السكانية تؤثر بشكل سلبي على كل القطاعات.

وأردف «أنا بتكلم وأنا واحد منكم، عمري ما هقولكم غير كده، هاتوا الكلام اللي قولته في الترشح هتلاقوني بقول الكلام ده، مقولتش للناس إن اللي قبلنا كانوا مش شاطرين وإحنا شاطرين، عمرنا ما قولنا إننا أحسن من اللي قبلنا، لا طبعاً.. نحن نحاول مجابهة ظروفنا، والناس تسأل متكلمش عليها ليه من 5 أو 6 سنين ليه؟.. في موضوعات لا ينفع أن نطرحها إلا في مناسبة، في أولويات التعامل مع أزماتنا ودلوقتي وجب التعامل مع الأزمة الحادثة».

وتابع: «انتوا بتحملوا نفسكم وأولادكم والدولة فوق طاقتها، وبالتالي تثوروا وتخرجوا للشوارع وتهدوا بلدكم، ويفضل المسلسل خراب في خراب، الناس عايزه تعيش، هنعيش إزاي؟».

وختم تعليقه موجهاً حديثه للمصريين: «والله اللي بذلته الحكومة والله معتبر وعظيم، وضخم جداً وغير متوقع، كل الناس بتقول إزاي إنتوا عملتوا كده؟ وإزاي هتعملوا اللي عايزينه؟».