السيسي من الأكاديمية العسكرية: مصرون على حل الأزمة الاقتصادية نهائيًا.. ولدينا خطة طموحة لتقليل فاتورة الاستيراد
لما بنتكلم عن الكهرباء إحنا محتاجين 18 ألف طن مازوت يوميًا علشان نشغل المحطات بكامل طاقتها
نعمل على توفير العملة الصعبة.. وخلال سنة هنكون دخلنا على خريطة سيناء أكثر من 450 ألف فدان وفي الدلتا حوالي 2 مليون فدان
أسعار السلع مرتفعة وده أمر محل تقدير.. والحكومة تعمل على مجموعة إجراءات لتخفيف آثار هذه الأزمة
كتب: عبد الرحمن بدر
زار الرئيس عبد الفتاح السيسي، الأكاديمية العسكرية، السبت، وتحدث في عدة ملفات خلال كلمة لطلاب وقادة الكلية.
وقال السيسي: “لما بنتكلم عن الكهرباء إحنا محتاجين 18 ألف طن مازوت يوميًا علشان نشغل المحطات بكامل طاقتها علشان توفر الطاقة في ظل درجات الحرارة المرتفعة، بنتكلم في أكثر من نص مليون طن مازوت في الشهر، سعرهم حوالي 300 – 350 مليون دولار، ده غير الغاز اللى إحنا ربنا سبحانه وتعالي الإنتاج منه بيقدم جزء كبير من الاحتياج للغاز الطبيعي، ولولا الإنتاج بتاعنا كنا هنكون في أزمة كبيرة”.
وتابع: “الحمد لله رب العالمين، حبيت أني اطمئنكم، وقد تكون الأسعار بتاعت السلع مرتفعة وده أمر محل تقدير، والحكومة تعمل على مجموعة إجراءات لتخفيف آثار هذه الأزمة”.
عبر السيسي، عن سعادته بالتواجد مع طلاب الأكاديمية العسكرية المصرية، قائلا: “سعيد باللقاء بيكم النهارده، واتكلم معاكم شوية، عارف أن الاختبارات النهائية للكلية أو الأكاديمية خلصت بالكامل، واتصور أن إحنا بنستعد لحاجتين في وقت واحد، تخريج دفعات جديدة من الأكاديمية والكليات العسكرية بالكامل، واستقبال دفعة جديدة من الطلبة الجدد إن شاء الله”.
وقال السيسي: “زي ما بقول دائمًا مصر لها ثوابت في سياستها تتسم بأنها تكون عامل استقرار في محيطها، ومصر تتسم بالتوازن والاعتدال ولا نتدخل في شئون الآخرين، ونكون عامل إيجابي في حل الأزمات وهي كتير، دول الجوار عندنا والأشقاء في ليبيا والسودان، الأزمات دي لها تأثير علينا أيضا، بنحاول نكون عامل إيجابي لحل هذه الأزمات”.
وتابع: “يمكن أنتوا كنتوا متابعين خلال الفترة اللى فاتت مؤتمر دول الجوار، وكان الهدف منه بالتنسيق مع دول جوار السودان أننا نوجد مخرج أو حل سلمي لهذه الأزمة حتى تنتهي معاناة الأشقاء وتنتهي الأزمة السودانية خلال فترة قصيرة إن شاء الله، ده تقريبا ملخص الموقف، ودائما بقول اطمئنوا مش علشان إحنا موجودين، لا علشان انتوا موجودين، وقبلنا كلنا فيه ربنا موجود وإحنا دائما بنقول إن ربنا مطلع وشاهد على أننا في بلدنا رغم الظروف الصعبة حريصين ومصرين على العمل والعمل بجد في كل القطاعات”.
وأكد أن الدولة تعمل على إيجاد حلول نهائية للأزمة الاقتصادية الحالية، مضيفا: “مصرون على حل الأزمة الاقتصادية دي من خلال حلول نهائية.. فيه خطة طموحة للاقتصاد والصناعة ومستلزمات الإنتاج وتقليل فاتورة الاستيراد من خلال بدائل وإنتاج مصري يغطي مطالب هذه المستلزمات والمنتجات اليومية”.
وتابع: “لما بنتكلم عن فاتورة الاستيراد من الخارج السنوية سواء من سلع أو مواد بترولية أو مستلزمات مختلفة أو أدوية، الاحتياجات الضرورية الأساسية بنتكلم في رقم كبير أوي، طول ما الرقم الكبير إحنا مش قادرين نوفره بالعمل والتصدير، وتوفير بدائل له جوه مصر، هنفضل نعاني، لازم الموضوع ده نتجاوزه”.
وأضاف: “نعمل على توفير العملة الصعبة ولن نتوقف عن توفير احتياجاتنا من السلع، ولما بنتلم عن 3 – 4 ملايين فدان إنتاج زراعي، ده رقم كبير أوي علشان يقلل جزء من فاتورة استيراد السلع الغذائية، خلال سنة كمان بالكتير هنكون دخلنا على خريطة سيناء أكثر من 450 ألف فدان وفى الدلتا حوالي 2 مليون فدان، وشرق العوينات وتوشكي بنتكلم في حوالي مليون فدان بالإضافة إلى مناطق أخري”.
