السيسي: لا أقلق من السوشيال ميديا.. كل ما هتصبروا وتقولوا يارب وتشتغلوا ربنا هيغير حالنا للأحسن  

اللي بيتولى قلوب العباد رب العباد.. إحنا كدولة بنجري أكتر من طاقتنا.. ومافيش حاجة بتتعمل لوحدها ولكن بجهدنا كلنا  

قال الرئيس عبد الفتاح السيسي، إنه لا يقلق من السوشيال ميديا، مضيفا: “أنا مش قلقان من السوشيال ميديا، لأن أنا عارف إن السوشيال ميديا عبارة عن دردشة الناس مع بعضها، بس على الهواء، دلوقتي الناس بتقعد على الفيس تتكلم لكن في النهاية كل واحد فينا في مكان بيشوف اللي بيتعمل، يعني لو حد اتعامل مع مستشفى والخدمة كويسة شاف، ولو حد اتعامل مع مركز طبي جوه قرية ماكنش موجود شاف، ولو الخدمات كانت بتتقدم في مكان والشخص راح مجمع الخدمات للحصول على خدمته شاف”. 

وتابع، في كلمته للأهالي بقرية الأبعادية بمحافظة البحيرة: “اللي بيتولى قلوب العباد رب العباد، وكل واحد بياخد نصيبه، ربنا مهيمن فخليك مع ربنا، هل إحنا كدولة بنجري على قد طاقتنا، لا والله العظيم أكتر من طاقتنا، مافيش حاجة بتتعمل لوحدها ولكن بجهدنا كلنا”. 

وقال السيسي: “لو كان فيه فرصة أكتر من كده هنعمل أكتر من كده، وموضوع الصناعة شغالين فيها جامد جدا دلوقتي لأن فيها فرصة كويسة جدا لحاجتين، أول حاجة التشغيل أي العمالة، والحاجة التانية تزويد الناتج المحلي بشكل كويس، ولو صدرنا نجيب دولار، ولو كفينا مش هنشتري بدولار”. 

وتابع: “قلت في زيارتي لزامبيا، إن كل ساعة الدولة تضيعها في اقتتال، ده خراب سنين، يعني بدل ما تختلف معايا اشتغل، أنت من حقك تشتغل وترفض بس اشتغل، شوفوا يا مصريين ليكم كلكم كل ما هتصبروا وتقولوا يارب وتشتغلوا ربنا هيغير حالنا للأحسن”. 

وأشار إلى أن حجم الإنفاق الذي كان يهدر بمحافظة القاهرة في الطرق 8 مليارات دولار سنويا. 

وقال: “كل شغلنا تخطيط استراتيجي يستهدف الدولة المصرية دلوقتي ولغاية 30 سنة قادمة بدليل أننى قلت عندنا جامعات حتى 2050 وده موضوع خلصناه ومطمن إن مفيش مشكلة في التعليم لأنها اتعملت على مستوى خريطة الدولة المصرية”. 

وأضاف: “البحيرة مرتبطة بوادي النطرون بيتعمل دلوقتي في المكان ده 2 مليون فدان والبحيرة فيها كام فدان؟ هي أكبر محافظة في مصر وانا جاي ببص من الطيارة اشوف حجم المباني المبنية على الاراضى الزراعية بيزيد ولا واقف ثابت زي ما هو؟ يعني قلت شوية..الـ 2 مليون فدان مفيهوش بيت واحد ولو هنعمل بيت هيتعمل في المناطق غير الصالحة للزراعة على الاطلاق ..الحد الأدني لو عاوز فرصة عمل هتجدها في هذا المكان.