السيسي: عشان نخلي الكهرباء شغالة 24 ساعة لازم أزود تمنها مرتين تلاتة
لو خدت تمن الكهرباء الحقيقي هضاعف التمن طب الغلبان هيروح مني فين؟.. والدولة تدعم المواطنين في ملف الكهرباء بمبالغ كبيرة
تحدث الرئيس عبدافتاح السيسي عن انقطاع الكهرباء، قائلًا: «عشان نخلي الكهرباء شغالة 24 ساعة ومفيش قطع للكهربا، لازم أخلي تمنها لوزير الكهرباء أد تمنها مرتين تلاتة، ولو خدت تمن الكهرباء الحقيقية هضاعف تمنها مرتين طب الغلبان هيروح مني فين، فأقطع الكهرباء ولا أغليها؟»، مؤكدًا أن الدولة تدعم المواطنين في ملف الكهرباء بمبالغ كبيرة.
وتابع خلال افتتاح عدد من المشروعات التنموية بجنوب الوادي: كنا عملنا خطة في 2016 عشان نخلي تمن الحاجة أد تكلفتها لكن لازم تحطوا في اعتباركم الأزمات اللي بتواجهنا أزمة كورونا والأزمة العالمية الموجودة والحروب وتأثيرها علينا واحنا مواردنا مش كتير تسمح اننا نواجه التحديات من غير جهد أو تحمل.
وقال السيسى، إن الدولة فى النهاية “موازنة”، مضيفا: أنت النهارده مش عاوز تيجى تمس حاجة الغلبان عاوز تساعد من غير ما تؤذيه.
وأضاف: لو الرغيف النهارده بـ 3 أو 4 أو 5 جنيه، فيه ناس تقدر تشتريه، بس مش كل الناس تقدر تشترى كده، فلازم نكون متفهمين لأن الدولة فى النهاية موازنة وطاقتها المالية كده.
ووجه المسؤولين بالتحدث للرأى العام عن التحديات التى تواجه الدولة قائلا: اتكلموا وقولوا الحكاية إيه للناس، قولوا ليه الكهرباء ليه مبتتعملش، ما تقولوا ليه؟ لو أخدت تمن الكهرباء الحقيقية هضاعف تمنها مرتين، طيب الغلبان هيروح منى فين؟ أقطع الكهرباء ولا أغلّيها؟ وأغلّيها قد إيه؟ اللى بيدفع جنيه هيدفع 2 و3، لو مواطن بيدفع 100 جنيه فى الشهر هاخد منه 300 جنيه طيب بنعمل إيه، بشرحها من باب إيه؟، أنا بتحمل المسؤولية أمام الله وقدامك علشان الكهرباء تستخدم 24 ساعة مفيش قطع كهرباء خالص لازم أخلى تمن الكهرباء قد تمنها مرتين 3 بقول تانى ليه مبزودش كده؟ علشان مديونية وزارة الكهرباء للبترول قد كده.
وواصل: طيب اللى باخده أقل من التمن، وبالتالى أنا مديون لوزارة البترول، أنا عندى مشكلة إنى أجيب البترول بالتمن ده وباقى الشركات اللى شغالة معانا ليها فلوس عندنا، طيب ده مديون وده مدين وده مش وليد النهارده ممارسات ماشين فيها بقالنا سنين.
وقال السيسي: واحنا بنعيب على المعنيين حتى فى التقارير الصحفية والمقالات اللى بتتكتب محدش بيتناول المسألة بشكل موضوعى خالص يا جماعة يا انتوا مش عارفين يا إحنا مخبيين عليكم، بكلمكم بمنتهى الصراحة الدول لا تدار كده، وإنما تدار بالجدية والمسؤولية والفهم ولو الناس فهمت هتيجى معاك وبقولك البديل أهو.. ممكن الكهرباء تشتغل 24 ساعة طبعا بس بكام؟.
