السيسي تعليقا على دعوات التظاهر: بيولعوا الدنيا ويستغلوا الظروف الصعبة.. ويوجه بسرعة انتهاء اشتراطات البناء واستمرارصرف منحة العمالة المؤقتة

الرئيس: بيختاروا الظروف الصعبة علشان يشككوا المصريين في اللي إحنا بنعمله.. الشعب والدولة حاجة واحدة محدش يدخل بينا

كتب- فارس فكري

قال الرئيس عبد الفتاح السيسي، إنه يراهن على وعي المواطنين فيما تقوم به الدولة، مشيرًا إلى أن حملات التشكيك مستمرة ضد مصر رغم ما تقوم به من إنجازات على كافة المستويات.

وجه الرئيس، الحكومة بسرعة الانتهاء من الاشتراطات الجديدة للبناء، وإعلانها للشعب، قائلا: “اشتراطات البناء والدنيا واقفة ودى مش من المصلحة.. خلصوا اشتراطات البناء وأعلنوها للناس والمسار الجديد إزاى هنظم عملية البناء في مصر علشان الدنيا تتحرك”.

وأضاف الرئيس خلال افتتاح ، لمجمع التكسير الهيدروجيني بمسطرد بمحافظة القليوبية: “عاوز أقول للناس الاشتراطات.. إن كان عندنا عيب في النظام خلا الدنيا كده وأنا بقول كلام مهذب.. كتير من بلدنا بالطريقة دى، لأن النظام اللى كان موجود قبل كده فى تنظيم البناء محتاج يتطور”.

كما وجه الحكومة باستمرار صرف منحة العمالة المؤقتة بواقع 500 جنيه شهريا حتى نهاية العام.

وشدد الرئيس، على أن وعي المواطنين هو السلاح الأقوي لمواجهة الأفكار الهدامة وحملات التشكيك، مؤكدًا أن الشعب والدولة كيان واحد.

وشدد الرئيس السيسي ، على أن ما تقوم به الدولة هو إصلاح وليس إفسادا، منوهًا إلى أنه لايخاف إلا الله ويعمل من أجل مصر وإصلاحها.

وأكد أن الدولة لديها إرادة لتطوير الأوضاع الحالية وتحسينها من أجل صالح المواطنين.

وقال: هوا ده الحال الصور اللي بتشوفوها دي، نصلحه ولا نسيبه؟، نصلحه.. طيب على حساب الناس ولا على حساب الدولة، يهمني أقول حاجة واحدة بس براهن على الناس.. على المصريين، مش قعدوا الكام أسبوع اللي فاتوا يولعوا الدنيا ويستغلوا المواقف الصعبة اللي نعملها، يا نعمل يا نسكت ونشوف المنظر ده وتبقى دي بلدنا، نصلح هيبقى فيه ظروف صعبة.

وتابع الرئيس: هما بيختاروا الظروف الصعبة علشان يشككوا المصريين في اللي إحنا بنعمله وإن ده ضدهم وعلى حسابهم، لا والله، ده رهان عليكم وبقول إنكم مقدرين وبتتحملوا، الشعب والدولة حاجة واحدة، محدش يدخل بينا.

وقال الرئيس إن مصر تحتاج  إلى مزيد من الجهد والعمل مُطالبًا المواطنين بالوعي بمخاطر ما يحاك بمصر وأهداف مخططات نشر الفوضى وزعزعة الاستقرار.

وشدد الرئيس على أنه لا أحد يستطيع خداع المواطنين، مشيرًا إلى أن مسار الإصلاح والتنمية مستمر.

جاء ذلك خلال افتتاح الرئيس السيسي ، اليوم الأحد، لمجمع التكسير الهيدروجيني بمسطرد بمحافظة القليوبية.