السيسي: اللي حصل في 2011 اتعمل علشان ماكنش فيه أمل وكان فيه إحباط.. وجامع وكنيسة العاصمة الإدارية 10% فقط تبرعات والباقي كملناه
أنا كسبت 2 تريليون جنيه من العاصمة الإدارية.. بعمل كيانات اقتصادية تجيب فلوس عشان أقدر أغني أهلي في مصر
كتبت: ليلى فريد
قال الرئيس عبد الفتاح السيسي، إن تشخيص حالة مصر واحد، ونحن لن نستطيع حل المشكلات إلا بتقديم أفكار، متابعا: “مش بطلب من الناس تعمل حاجة ولكن يكون قلبك مع اللي بيتعمل، وإحنا قلبنا كلنا على قلب بعض، والغلبان مش كفاية غلب؟”.
وتابع في مداخلة هاتفية مهمة مع الإعلامي يوسف الحسيني، ببرنامج “التاسعة” بالقناة الأولى بالتليفزيون المصري: “الجامع والكاتدرائية في العاصمة الإدارية.. تبرعات المصريين 10% فقط لإنشائهم، والباقي كملناه”.
وأضاف: “اللي حصل في 2011 اتعمل ليه، علشان ماكنش فيه أمل وكان فيه إحباط، وكان التشخيص اللي بيطرح من المثقفين والإعلاميين والسياسيين لا يعبر عن الواقع، ونحن خسرنا 477 مليار دولار في هذه الفترة، ولما انتوا يا مصريين علمتوا كده.. مش لما تكسروا تصلحوا؟.. نحصلوا كلنا مع بعض، أنا بصلح اللي انتوا عملتوه واللي كسرتوه علشان أرجعه تاني”.
وقال السيسي، إن إنشاءات العاصمة الإدارية وفرت 2 تريليون جنيه حتى الآن، على الرغم من تطوير 40 ألف فدان من أصل 175 ألف فدان إجمالي المشروع.
و أضاف السيسي: “اللي ما يعرفش ما يتكلمش علشان مايبنيش رأي عام خاطئ ويضيع حق الناس، أنا كسبت 2 تريليون جنيه من العاصمة الإدارية التي تقام على 750 مليون متر مربع، يعني لو المتر بـ100 جنيه يبقى 75 مليار جنيه، ولو المتر بـ1000 جنيه يبقى 7.5 تريليون جنيه”.
وأكمل: “بنيت الحي الحكومي وبعمل المرافق من البيع اللي بعته، وعندي كشف البنوك من شركة العاصمة اللي عندها 45 مليار جنيه، وائتمان بقيمة 45 مليار جنيه أخرى، أنا بعمل كيانات اقتصادية عشان أقدر أغني أهلي في كل مصر، أبني كيانات تجيب فلوس”، مضيفا: “ربط فكرة الاقتصاد بسعر صرف الدولار فكرة غير صحيحة”.
وأتم الرئيس: “من يطرح حلول ومهتم في تلك الظروف الصعبة، وكفى ما حدث في عام 2011، ولم يظهر أحد في 2013، تركتوها حتى احترقت كلها، ولم يستطع أحد الوقوف، وإلا كانوا ذبحوهم في الشوارع، ولم يكن أحد يستطيع أن يرفع صوته، لولا أن هناك جيش قوى وقادر وأنا كنت شاهد عيان”.
