محمود هاشم يكتب: المربع الأخير (إبداعات)

شطرنج

لكن لا وزير ولا فيل

ولا ملك متحامي في حاشيته

كل اللي ع الرقعة النهاردة جنود

وكلهم من حقهم الاختيار

بين مين يموت أولًا

ومين يكمِّل اللعبة

جايز يعيش

—-

استبعدوا كل اللي بيحرَّك حشود

الاختيار محدود

زيدوا كمان كل العجايز

والأرامل واليتامى

والفواعلية

وكل كائن حي بلا دية

وحتى أطفال الشوارع

وصعاليك المدينة

من معدومين الرؤية والمنظور

كله يهون فداء نقاء الجين

والترقية

وغريزة البقاء

—

كَش الملك

وفضيت الخانات

إلا مربع وحيد

يتواجهوا فيه البيادق بالبنادق

لاختلاف الرأي في الكورة

وفي التثقيف

وفي الفكر السياسي

واللي يفوز في المعركة خسران

—

إحنا الجنود

وإحنا كمان الضحايا

واللي هتيبقَّى لوحده يعيش

لكن لوحده