افتكروهم واكتبوا عنهم.. رسالة أمنية فوزي زوجة الزميل سيد عبداللاه له في محبسه: أطفالك ينتظرونك.. يشمون ملابسك يشعرون بالأمان
أمنية: ٤٠١ يوم مروا على غيابك.. مرت كل المناسبات وانت بعيد عننا وبتتعاد تاني علينا وانت لسه محبوس واحنا في زنزانتنا
أمنية تنشر صورة طفلها في أول يوم له بالمدرسة: محروم من والده بجواره في أهم يوم في حياته.. وفي عيونه 100 سؤال (بابا فين؟)
الزوجة تناشد: سيد مش مجرم ولا إرهابي عشان يبقى مكانه السجن لكن وسط أطفاله اللي محرومين منه في أهم فترات حياتهم
كتب- حسين حسنين
أرسلت الزميلة أمنية فوزي، زوجة الزميل الصحفي سيد عبد اللاه، المحبوس منذ أحداث 20 سبتمبر 2019 بعد القبض عليه أثناء ممارسته عمله الصحفي وتصوير وقائع احتجاجات السويس، برسالة إلى زوجها في محبسه بعد مرور أكثر من عام على الحبس.
يأتي ذلك ضمن فعاليات حملة “افتكروهم واكتبوا عنهم” التي أطلقها موقع “درب” للحديث عن أوضاع الصحفيين وظروف حبسهم واحتجازهم والمطالبة بالإفراج عنهم.
ويواجه سيد عبد اللاه اتهامات على ذمة القضية رقم 1338 لسنة 2019 حصر أمن دولة بنشر وبث وإذاعة أخبار وبيانات كاذبة، إساءة استخدام وسيلة من وسائل التواصل الاجتماعي “فيسبوك”، ومشاركة جماعة إرهابية مع العلم بأغراضها.
وتقول الزوجة في نص رسالتها:
٤٠١ يوم مروا عالغياب زوجي ورفيق دربي ٠٠٠ مرت كل المناسبات وهو بعيد عننا وبتتعاد تاني علينا نفس المناسبات وهو لسه بمحبسه بطره واحنا بمحبسنا بالخارج قسما بالله شعوريَ انا واولاده فزنزانتنا الخاصة بنا ولا يعلم بها احد سوانا.
احنا مش اكتر من اموات بنتحرك٠٠ اتكررت المناسبات واتعادت تاني، علينا ٦ أكتوبر و٢٤ أكتوبر عيد السويس القومي سيد فالايام دي بيكون فقمة حماسه لانه عاشق لتراب وطنه ٠٠ سيد مايستاهلش يكون مكانه زنزانه.
اولادي اتدمروا نفسيا جدا ٠٠٠ اياد ابني ماسك ملابس باباه وبيشمها ويحضنها ولما اخدتها منه بكي َوصمم تفضل فحضنه ولاول مرة من وقت القبض عالسيد ابني ينام النوم العميق ده لانه اخدت تيشيرت سيد فحضنه واوهم نفسه انه فحضن والده٠٠ مروان ماسك صورة باباه وقاللي سيبيني مع بابي شويه عايز اتكلم معاه٠٠ اياد اول يوم دراسة بداية اهم مرحلة فحياته رايح مدرسته وفعينه ١٠٠ سؤال ودموع ان رايح من غير اعز الناس ليه٠٠ كلامي مش مرتب ولا منظم لاني وصلت لمرحله صعبة اوي حياتي مدمرة محطمة اولادي ماشفوش باباهم من شهر ١٢ هو رافض يشوفوه وخصوصا من ورا سلك ٠٠ ماتت جوانا كل معاني الحياه ٠٠٠ بحاول اصمد لكن صعب اوي ٠٠
كلمة مروان لسيد ٠٠ وحشتني عايزك ٠٠ نفسي تيجي توديني المدرسه ٠٠ عايزك ترجع انا بحبك٠٠انا بعيط كل يوم وبصلي لربنا وبرضه مابترجعش ٠٠
كلمة اياد٠٠ عايزك ترجع َابوسك واشم ريحتك وحشتني يا بابي
اما اسر فللاسف مايعرفش حتي شكل سيد لانه اتقبض عليه وهو ٩ شهور النهاردة هو سنه وَ١١ شهر ٠٠اسفة يا ابني مش بأيدي انك ماتعرفش يعني ايه اب.
اما رسالتي انا٠٠ هي للسيد رئيس الجمهرية ٠٠ ياسيادة الرئيس ٠٠ هذا الشاب زوجي خلف اسوار السجون تخلت عن ملامحه كل معاني الحياه والانسانية ٠ سيد مش مجرم ولا ارهابي، سيد نزل هو واسرته لتفويض سيادكم ٠٠سيد كان ومازال مضطهد من الجماعه المحظورة بسبب ارائه المضاده لهم ٠ وسيادتك تعلم جيدا مدي اضطهادهم لمن يخالفهم الراي وبالرغم من ذلك زج معهم بنفس السجن ٠٠ انا اخشي عالحياة زوجي ٠٠ أبناء الوطن البررة مازالوا فالسجون ٠٠
