رائد سلامة يكتب : كورونا.. (ابداعات)

و قَالوا كَارْثَةْ

جَوعَى و وَبَا

و كُورُون بيُحْصُد فِ الرؤوس

رؤوس بَشَر

كُل المِلَلْ

كُل النِحَلْ

عَرَب، عَجَم، غَجَرْ

إسبان، لاتين، هُندوسْ

طَليان و أمريكان ورُوسْ

و صُفْر في لون الرِمَالْ

و سُود و بِيضْ

سَادة و عَبيدْ

أما صحيح هذا الكُورون

فَيرُوس لئيمْ

جِدًا و نَدلْ

لَكِنْ بَقَى رَب العِبادْ

سَتَّار حَليمْ

طَيب رَحيمْ

و لأنُه عَدلْ

يِنْهِي الحِكاية كالبِداية

و الرِوَاية

خلاص فِينَالْ

و بَعد مَا يزول الكَابوس

الناس تِعودْ

تِرفَع فؤوس

تِزرَع وُرُودْ

و قمح في لون الدَهَبْ

فتِترِفَع كًل الحُجُب

الناس تِعودْ

تَفتَح قَاموس

مِن مُفردَات حِنَيْنَة

و مُؤمِنَة

إن الحكاية مهما صِعْبِت هَيْنَة

و يعبدوا رَبْ السَما

لَكِنما

تِفضَل فِ قلب القلب غُصة إنما

الحِلم برضُه فِ النهاية ينتِصِر

وَ التينِ وَ الزَيتونِ لمَّاً يِتعِصِر

فِ بلاد بعيدة زي ديوان القمر

هتلاقي كُل الناس تعود

زي الشموس

زي الدُرَر

بيرْكَبوا مليون جِناحْ

و يبعتوا ولادهم مَدارس فِ الصباح

ياخدوا بَدَال الدَرس آلاف الدروسْ

بِدون كِمامةْ

ماهو ده القانونْ

و ده الناموسْ

و دي العَلامَةْ