أمير كرارة: لا أشاهد التليفزيون ولا أذهب للسينما ولا أسمع الموسيقى 

مراتي كل يوم بتتفرج على مسلسل تركي نفس الحوار كل يوم وأنا بقعد جمبها وأكل البطيخ ألاقيها قاعدة بتتفرج على المشهد وتعيط 

قلدت بيكي بلايندرز  في سوق الكانتو.. إيه المشكلة لما نعمل حاجة شبهه ما فيه زمن بتاع البريهات والبالطوهات 

كتبت: ليلى فريد وصحف  

قال الفنان أمير كرارة إنه لا يشاهد التليفزيون ولا يذهب للسينما وحتى الموسيقى لا يسمعها. 

وتابع كرارة خلال لقائه في برنامج “الراديو بيضحك” مع فاطمة مصطفى عبر إذاعة “الراديو 9090”: “أنا لا بتفرج على تليفزيون ولا بدخل سينمات ولا بسمع مزيكا ولا بشغل كاست العربية، بروح سينما مع أولادي ساعات”. 

وأضاف:”مراتي كل يوم بتتفرج على مسلسل تركي، كل الستات يتجمعوا يتفرجوا سوا يا يتكلموا في التليفون، نفس الحوار كل يوم، أنا بقعد جمبها مبصش على التليفزيون وأكل البطيخ، ألاقيها قاعدة بتتفرج على المشهد وتعيط”. 

وعن مسلسله الأخير “سوق الكانتو” واتهامه بأنه تقليد للمسلسل البريطاني Peaky Blinders، أكد أنه كان يقصد تقديم نفس الفترة الزمنية. 

وتابع: “أول ما نزل البوستر أتقال بيقلدوا (بيكي بلايندرز)، اه إحنا بنقلده، أنا صريح جدا على فكرة، أنا كنت قاعد على الكرسي وحسين المنباوي جمبي وكان المسلسل شغال قلت له هموت واعمله”. 

وتابع: ويا عم آه بنقلده، إيه المشكلة لما نعمل حاجة شبهه ما فيه زمن بتاع البريهات والبالطوهات، مش كان فيه مصر ما تيجي نعمل الزمن ده، وعملنا حدوتة تانية خالص، وأنا حبيت أغير الشكل بشكل المسلسل بالحدوتة والزمن، فتلاقي اللبس والشوارع والديكور مختلف، وقلت لهاني سرحان نفسي أعمل حاجة شبه بيكي بلايندر. 

يشار إلى أن كرارة قدم مسلسل “سوق الكانتو” في شهر رمضان الماضى، وشارك في بطولته مي عز الدين، فتحى عبد الوهاب، أحمد صلاح حسنى، مها نصار، عبد العزيز مخيون، محمود البزاوى، شيرين، ندا موسى، تامر نبيل، ثراء جبيل، سلوى عثمان، ضياء عبد الخالق، أحمد التهامى، شريف ادريس وعدد آخر من الفنانين، تأليف هانى سرحان وإخراج حسين المنباوي، وإنتاج شركة سينرجي.