الموقف المصري: ندعم دعوات وزارة الصحة ونقابة الأطباء للتبرع بالدم.. المخزون بدأ في التناقص بسبب الحظر

كتب – أحمد سلامة

أطلقت صفحة “الموقف المصري” دعوة للتبرع بالدم، اليوم الثلاثاء، استجابة لطلب وزارة الصحة ونقابة الأطباء، خشية حدوث تناقص في المخزون.
ولفتت الصفحة إلى أن مصر لديها مخزون استراتيجي للدم ولكن بسبب ظروف الحظر بدأت كميات التبرع في التناقص، بالإضافة إلى انخفاض معدلات التبرع المعتادة سنويًا بسبب شهر رمضان.

وإلى نص الدعوة..

“دعوة للتبرع بالدم في استجابة لدعوة وزارة الصحة .. #عشان_الدم_ميقلش**

– قبل أيام وزارة الصحة طلبت من المواطنين التبرع بالدم في المراكز المخصصة لده، منعا لحدوث تناقص في المخزون، وقبلها نقابة الأطباء أطلقت نداء زيه.

– مصر عندها مخزون استراتيجي للدم، لكن بسبب ظروف الحظر بدأت كميات التبرع للدم تنقص، ومثلا عربيات التبرع المتنقل الي كانت بتروح قدام زحام مساجد معينة والناس حافظة مكانها مبقتش قادرة تشتغل بنفس الكيفية، ده غير إن خوف الناس من العدوى بكورونا بيخلي كتير منهم يتجنب أي مستشفيات أو مراكز طبية أو عربيات التبرع بالدم.

– ومع دخول شهر رمضان، تبرع الناس بيقل بسبب الصيام، عشان كده الدعوات بتركز على تبرع أكبر عدد من الناس خلال الفترة الجاية.

– كل ثانيتين فيه مريض مصري بيحتاج نقل دم، ونقص كميات الدم بيهدد حياة مرضى كتير، خصوصا اللي بيعانو من انيميا البحر المتوسط أو بيعملوا غسيل كلى، أو مرضى الأورام السرطانية وأمراض الدم، وبيحتاجو نقل دم بشكل دوري مستمر، عشان كده لازم يكون فيه تبرع مستمر بالدم، خصوصا إن مدة صلاحيته بتكون شهر واحد، ولازم المخزون يتجدد طول الوقت.

– المسؤولين في وزارة الصحة بيؤكدوا إن مراكز وعربيات نقل الدم بتعمل كل الإجراءات الوقائية، وإن عمليات التعقيم بتتم مرتين يوميا.

– صفحة الموقف المصري بتدعم حملات التبرع بالدم، وبنطلب من كل المتابعين يشاركوا في الحملة، سواء بالتبرع في السيارات المتنقلة اللي الوزارة قالت إن عددها اتضاعف، أو في المركز القومي لخدمات نقل الدم في العجوزة، أو فروعها في كل المحافظات، من الساعة 9 صباحا للساعة 3 عصرا.

– ممكن كمان تعرفوا أقرب فرع ليكم، وتحجزوا معاد قبل ما تروحوا، تجنبا لأي زحام، من خلال صفحة
Egyptian National Blood Transfusion Services
(خدمات نقل الدم القومية مصر)
أو عن طريق أرقام تليفونات الفروع في المحافظات اللي هتلاقوها موجودة على نفس الصفحة، وهتلاقوها برضه في المصادر بأول تعليق على البوست ده.

– ونتمنى بأقرب وقت نعدي الأزمة دي على خير بوقوفنا كلنا سوا”.