منى مينا تكتب: أسئلة حول لقاحات كورونا.. ماذا بعد؟

أعداد الإصابات والوفيات وخصوصا في الأطباء مرعبة، الوقاية من انتشار الوباء لها طريقين لا ثالث لهما: الإجراءات الاحترازية .. واللقاح.

بالنسبة للإجراءات الاحترازية فللأسف.. الوضع فيه درجة رهيبة من التراخي زي ما كلنا شايفين، سواء على مستوى الإجراءات الحكومية .. أو على مستوى أغلب الأفراد.

وطبعا ضروري نفتكر وإحنا داخلين على رمضان .. ربنا يعيد الأيام بالخير على الجميع- ضروري نفتكر إن الظروف لا تسمح بتجمعات وعزومات، يا ريت الناس تحتفل في أقل حدود ودون التعرض للزحام والاختلاط مع أعداد كبيرة.

عموما خلينا نعترف إن الإجراءات الاحترازية عندنا ضعيفة ومتراخية.. لذلك يبقى لنا أن نلتمس الحماية في نشر اللقاح.

ولكن -للأسف برضه- في مواطنين كتير .. وبرضه أطباء كتير متخوفين من اللقاح، اللقاح في نظري هو الطريق اللي بيشاور عليه العلم لخروج العالم كله من محنة كورونا.

في ناس ممكن يحصل لها بعض النواتج الجانبية من اللقاح ..حرارة ..صداع ..آلام بالجسم .. حالة اجهاد ..أيوه ممكن ..بس كل اللقاحات ممكن تعمل كده.

وعموما ملايين البشر حول العالم أخدوا اللقاح .. يعني اللي كان خايف في الأول مفروض يكون اطمن حاليا .. كمان الدول اللي قامت بتطعيم نسبة كبيرة من مواطنيها ..قلت فيها نسب الإصابات ..ونسب الوفيات.

في مناقشات حول إن حماية اللقاح مش 100% .. وفي ناس أخدوها واتعدوا بعد كده.. أيوه طبعا حماية اللقاح مش 100% .. ولكن العدوى -لو حصلت- بتبقى خفيفة.. أعتقد مهم جدا إن الواحد حتى لو التقط العدوى شده المرض لا تصل للاحتياح للحجز في مستشفى ولا عناية مركزة.

يا جماعة خلينا فاكرين ..إحنا كان عندنا مشكلة رهيبة في إيجاد مكان في العناية من قبل كورونا .. يعني الموضوع حاليا صعب جداجدا ..

طيب ناخد أي نوع ؟

ناخد اللي موجود يا جماعة .. معندناش رفاهية الاختيار ..

طبعا التعليمات الطبية بتقول اللي بياخدوا علاج مهبط للمناعة أو عندهم مرض يؤثر على المناعة ياخدوا سينوفارم ..غير كده ناخد المتاح.

أما رعب الجلطات مع لقاح استرازنكا.. فخلينا نفتكر ان نسب الجلطات اللي بيتكلموا عليها نسب قليلة جدا جدا.. وأقل من النسب الموجدة عادي جدا وسط البشر بدون اي لقاح.. وطبعا أقل بكتير من نسب الجلطات اللي بتحصل مع العدوى والمرض الفعلي ..

أعتقد مهم الاعلام يقوم بدور في مناقشة مخاوف الناس من اللقاح بشكل علمي .. ويا ريت اللي يقوم بالمناقشة والشرح تكون رموز طبية محترمة ومصدقة .. بلاش الرموز الفاقدة لثقة الناس… عشان الناس تصدق بس .. ده لو مهتمين إن الناس تصدق وتاخد اللقاح فعلا.

..

تبقى مشكلة إن الناس الراغبة قي أخذ اللقاح مش كلهم عارفين ياخدوه.

وفي أطباء راغبين في أخد اللقاح ومش عارفين ياخدوه ..

وفي مسنين وأصحاب أمراض مزمنة برضه لم يصيبهم الدور .. وفي شباب أخدوا اللقاح قبل الفئات اللي مفروض لها أولوية ..

..

بإختصار ..محتاجين إتاحة أعلى للقاح .. وتوزيعه بشكل يراعي الأولويات الطبية المعروفة .. محتاجين نستكمل تلقيح الفرق الطبية أولا .. ثم المسنين وأصحاب الأمراض المزمنة ..

مع عمل حملات دعاية علمية محترمة ..ومن رموز محترمة قادرة على إقناع المواطنين.