مقعد خال على الإفطار| جواب غير مرسل لمحمد الباقر من زوجته.. تاني رمضان من غيرك.. مش بأيدي حاجة أعملها تخرجك
كتب- فارس فكري
تحت عنوان جواب غير مرسل لباقر نشرت نعمة هشام زوجة المحامي المحبوس محمد الباقر نص خطاب لزوجها بمناسبة أول يوم رمضان الثاني بدونه.
وقالت نعمة في تدوينة على الفيسبوك: تاني يوم رمضان من غيرك مش بأيدي أعمل أي حاجة أخرجك بيها يا ترى بتاكل أيه ولا بتعمل أيه، ربنا يلهمك الصبر والحكمة .. ويثبتلك قلبك وعقلك لحد ما تخرجلي .
وتم اعتقال المحامي الحقوقي البارز محمد الباقي في 28 سبتمبر عام 2019، بعدما توجه إلى نيابة أمن الدولة العليا لحضور التحقيقات مع الناشط علاء عبد الفتاح، ولكن فوجئ الباقر باحتجازه داخل النيابة، ليتم إبلاغه بعد ذلك بصدور أمر ضبط وإحضار له.
وكانت المفارقة إدراج الباقر متهما على ذمة نفس القضية التي تم إدراج موكله علاء عبد الفتاح على ذمتها، والتي حملت أرقام 1356 لسنة 2019 حصر أمن دولة عليا.
ويواجه الباقر في القضية، اتهامات ببث ونشر وإذاعة أخبار وبيانات كاذبة، إساءة استخدام وسيلة من وسائل التواصل الاجتماعي “فيسبوك”، ومشاركة جماعة إرهابية مع العلم والترويج لأغراضها.
وفي نهاية شهر أغسطس 2020، تم تدوير الباقر على ذمة قضية جديدة، حيث تم إحضاره من محبسه إلى مقر نيابة أمن الدولة، والتحقيق معه على ذمة القضية رقم 855 لسنة 2020، ووجهت له نفس التهم بالقضية القديمة وبسؤاله عن اسم هذه الجماعة الإرهابية أو أدلة الاتهامات، لم يتلق أي رد.
وقالت نعمة: جواب غير مرسل لباقر، عن رمضان .. وكآبة رمضان من غيرك.
يا محمد تاني رمضان من غيرك .. تخيل! العجز هيجنني .. مش بأيدي اعمل أي حاجة أخرجك بيها .. رمضان اللي فات ما كانش يخطر على بالي أن هيجي رمضان اللي بعده وأنت لسه مش معايا .. تخيل اكتر مكان عنيا بدمع فيه ايه؟ السوبر ماركت وحياتك .. مش ادام الشروق والغروب .. عشان أنت صاحب مزاج عالي يا حبيبي .. فاكر لما كنا ننزل مع بعض وتحب نجيب ده ونجرب ده .. بأقف ادام الأرفف والتلاجات وادمع والله وبحس بقهر رهيب وأنا مش عارفة اجيبلك من الحاجات اللي بتحبها .. أكتر حاجة كانت بترفه عنك بعد يوم طويل كئيب في النيابات والمحاكم ..
فاكر كل رمضان لينا مع بعض من أول لما اتجوزنا .. والديش بارتي العائلي .. وانت بتلف في صمت وتأني بين عشرين صنف وتاخد عينات استكشافية في اللفة الأولى .. وبعدها تقرر تاخد ايه وتلف لفة تانية .. في منتهى التركيز والجدية .. وتقدر تكتب مقال نقدي تحليلي عظيم بعد كل عزومة .. وستات العيلة يحبوا يسمعوا رأيك وتحليلك .. مفتقداك جداً جداً .. البيت لوحدي سنتين ورا بعض في رمضان كئيب أوي يا محمد والله .. ربنا يرجعك ليا .. مش متخيلة عيد تالت يجي عليا من غيرك ..
يا ترى بتاكل ايه ولا بتعمل ايه .. كل امكانياتك الحالية اكل التعيين والكانتين وسخان المايه .. كل ما احاول اتخيل!! الأذان والفطار والصلاة والسحور .. كله لوحدك من غيرنا .. كله في نفس المكان .. كل يوم .. مش عارفة عارف تكمل ازاي لحد دلوقتي .. ربنا يلهمك الصبر والحكمة .. ويثبتلك قلبك وعقلك لحد ما تخرجلي ..
#الحرية_لباقر
