مذيعة تثير أزمة بعد ضرب عروس الإسماعيلية: «جربي تقولي عايز إيه يا سيدي وتاج راسي».. ومعلقون يردون بـ«#اوقفوا_ياسمين_عز»

ياسمين: سعادة المرأة في وجود الرجل بحياتها.. ومن تقول من أول ضربة أو لمسة أو تكة طلقيه دي مش بتحبك ومش هتجيب لك عريس

المذيعة: مين في مصر عمل الفرح ومكنش في خناقة الفرح بلا استثناء بسبب عين حسد.. لازم يوم الفرح تحصل الخناقة

كتبت: ليلى فريد

 أثارت ياسمين عز مقدمة برنامج “كلام الناس” على فضائية (إم بي سي مصر)، أزمة بسبب دفاعها عن عريس الإسماعيلية الذي اعتدى على زوجته، وهي الواقعة التي شغلت رواد مواقع التواصل الاجتماعي خلال اليومين الماضيين.

وتصدر هاشتاج #اوقفوا_ياسمين_عز، قائمة الأكثر تداولا بعد تصريحات المذيعة وتعليقها على الواقعة.  

وقالت ياسمين عز: “الرجل بطبعه حامي وحمش، وعلى المرأة أن تحتوي رجلها، فهو هدية ربنا لكِ على الأرض، ونعمة من ربنا عليكِ، حبيه وحافظي عليه، فهذه العروسة بنت ناس وأصيلة ولمت دنيتها، ودارت على شمعتها واحتوت الموقف وجوزها ورجلها، ومش معقول هتبوظ ليلتها وفرحها وحب 13 سنة عشان موقف إحنا مش عارفين تفاصيله، مش كل اللي تشوفه أو تسمعه في كاميرا فيديو اتصور في شارع أو في بيت تصدقه”.

وتابعت: إحنا لينا بالنهاية، وهما سمن على عسل، أكيد العريس عنده رصيد كبير عند عروسته، والمسامح كريم، سعادة المرأة في وجود الرجل في حياتها، ومن تقول من أول ضربة أو لمسة أو تكة طلقيه دي مش بتحبك، واللي بتقول لك كدة مش هتجيب لك عريس، فمش كل حاجة تحصل من الرجل نقول يلا طلقني، ويقولون (ضل رجل ولا ضل حيطة).

وأضافت ياسمين: عارفين زمان الستات الطيبين كانوا بيقولوا، يا سي محمد يا سي عمر، وهي مأخوذة من سيدي وتاج راسي، سيقولون نرجع لعصر الجواري لأ، من ترتدي التاج هي الملكة، فأنتِ ملكته، جربي قولي له (عايز إيه يا سيدي وتاج راسي) وشوفي هيعملك إيه، والله ما هيزعلك، دي روشته كدة ونصيحة، اسمعي اللي بيقول لك حافظي على بيتك مش روحي اتطلقي.

واستكملت: مين في مصر عمل الفرح ومكنش في خناقة الفرح بلا استثناء، جارتك وقريبتك وكلنا فهي عين حسد، لازم يوم الفرح تحصل الخناقة.

واختتمت ياسمين عز: “أنا دائما وأبدا ضد العنف الأسري وضد ضرب المرأة، لكن أتحدث عن هذه الواقعة تحديدا، مانسخنش الدنيا ونقول للعروسة اعملي وسوي، وطالما هو راضي وأنا راضي مالك بينا يا قاضي، وضرب الحبيب زي أكل الزبيب، مش أي ضرب ولكن مش من أول تكة أمحيه له تاريخه ممكن تكون غلطة، ألم الدنيا وأقفل على بيتي، العروسة بنت أصول وبنت عيلة، والعريس أنا واثقة أنه يحبها، وطالما لم يتحدثوا في التفاصيل فهي لا تهمنا”.

يذكر أنه تداول رواد التواصل في محافظة الإسماعيلية مقطع فيديو لتجمع في الشارع بين أسرتي وأقارب عروسين، ووصف بعض رواد مواقع التواصل الأمر بأنه مشادة كلامية تطورت لاشتباك بالأيدي، واعتداء العريس على عروسه، وتدخل الأقارب لاحتواء الموقف.

وخلال مقطع الفيديو تظهر العروس وسط أسرتيهما والأقارب في حالة تشبه الإغماء، بينما حاول المتواجدون في محيط الحدث إفاقتها، وبعد شد وجذب انسحبت العروس من المشهد مرددة (حسبي الله ونعم الوكيل).