محمود سعد يُعلن توقف برنامجه «باب الخلق»: هبدأ مرحلة جديدة.. ربنا فتحلنا سكة تانية ممكن نتقابل على «يوتيوب» (فيديو)

الإعلامي: دلوقتي هنمشي ونتجول في الشوارع ونصور ونتكلم ونحاول نقدم اللي نقدر عليه في كل المحافظات

سعد: إذا كان فيه قيمة لبرنامج باب الخلق فهي الناس اللي في الشارع اللي شرفوني وفتحوا قلوبهم.. محبة كبيرة لهم ولكم

كتب: عبد الرحمن بدر

أعلن الإعلامي محمود سعد، في فيديو على صفحته على وقف برنامجه «باب الخلق» المذاع على شاشة تلفزيون النهار، مؤكدًا أنه سيبدأ مرحلة جديدة.

وقال سعد في مقطع فيديو نشره بصفحته على (فيس بوك): خبر مش لطيف، مش عاوز أقوله في التليفزيون، لأني لا أحب الوداع، باب الخلق خلاص ملوش نصيب يستمر أكثر من كده،.. ربنا فتحلنا سكة تانية، ممكن نتقابل على اليوتيوب..

وتابع سعد أن توقف برنامجه المفاجئ عن شاشة التليفزيون لم يكن بسبب القناة الناقلة له، نافيًا وجود مشكلات مع القناة.

وقال سعد: بقالي 10 سنين بيقولولي اعمل قناة على اليوتيوب وأنا أرفض، ولكن اكتشفت في نفسي حاجة ماكنتش أعرفها، وربنا فتح لي طاقة تانية لم أكن متخيلها.

وطالب سعد الجمهور، بضرورة أن يوجهه لما يطلب، لأنه يسمع الكلام ويحب أن ينصحه الجمهور، مؤكدًا أنه يكره فكرة إعطاء النصائح للجمهور، وأنه يحب أن يكون قدوة ومثلًا عن طريق الأفعال وليس الأقوال.

وتابع سعد: دلوقتي هنمشي ونتجول في الشوارع ونصور ونتكلم ونحاول نقدم اللي نقدر عليه، مش لغرض إلا غير إني أفرجكم الناس اللي أنتم ممكن في زحام الحياة مبتشوفوهاش، واللي أنا شخصيًا مبشوفهاش، وبشوفها معاكم من أول وجديد وبكتشف الناس من أول وجديد.

وأكد سعد أن برنامجه الجديد لن يقتصر في تقديمه على محافظة القاهرة فقط، وإنما سيتجول في كثير من الأماكن والمحافظات، قائلًا: هأركب عربيتي أو أجر عربية ميكروباص أو تاكسي، وننزل نصور مع الناس في كل محافظة من محافظات مصر، بلدنا مليانة بأماكن حلوة وإن شاء الله أفرجكم على أماكن حلوة وتعجبكم.

وبعد ردود أفعال على مواقع التواصل الاجتماعي عبرت عن حزنها لتوقف البرنامج، قال سعد في تدوينة له: ماكنتش اعرف إن باب الخلق له هذه القيمة إلا لما قرأت ردود الفعل بعد توقف البرنامج.. وإذا كان فيه قيمة للبرنامج فهي قيمة الناس اللي في الشارع اللي شرفوني وفتحوا قلوبهم.. محبة كبيرة لهم ولكم.