محمد رحيم يُعلق نشاطه لأجل غير مسمى ويلمح للاعتزال والهجرة: الرجل الأكثر نفوذًا هيقعدنا في بيتنا جوه بلدنا كمان ولا إيه؟  

كتب: عبد الرحمن بدر 

قرر الملحن محمد رحيم اعتزال مهنة الفن والتلحين، لحين إشعار آخر، دون الكشف عن أسباب اتخاذه هذا القرار، وكتب عبر حسابه الخاص على موقع التواصل الاجتماعي (فيس بوك): تعليق كل نشاطاتي الفنيه لأجل غير مسمى حتى أشعار آخر مع احتمالية اعتزال المهنة والسفر خارج البلاد. 

وعلق رحيم على حفل دار الأوبرا مؤخرًا، الذي حضره تركي آل الشيخ، رئيس هيئة الترفيه بالسعودية، وعدد كبير من نجوم الغناء، قائلا: “سؤال ياجماعه هو ينفع حفله زي دي تعزموا كل ملحنين وصناع الموسيقى في مصر الا محمد رحيم طيب إزاي؟، ده أشهر وأهم أغاني النجوم دي كلها من أعمالي يعني شيرين اللى طلعت غنت مشاعر والوتر الحساس وصبري قليل كل دي حاجات محمد رحيم مع احترامي لكل المبدعين اللى موجودين طبعا كلهم فوق راسي واخواتي،  وعمرو دياب اللى قاعد، ده أنا واخد معاه جائزه الـ ميوزيك اوورد العالمية وطلع غنى غنوتي وهو بيستلم جائزته سنه 2001”. 

وتابع: ومعالي وزيرة الثقافة اللى شرفت الحفلة حرفيا وهي سيدة فوق الوصف في الاخلاق وبكن ليها كل حب واحترام هي اللى سهلتلي إجرءات السفر لفرنسا من كام شهر علشان أروح استلم جائزة العضوية الكاملة الماسية اللى هى آخر حاجه ممكن يحصل عليها ملحن أو مؤلف على مستوى العالم، وبالمناسبة وأنا هناك جبت معايا كل شهادات التقدير والاحتراف بتاعت زملائي الأصغر مني سنا كلهم اللى كانوا أول مره بيتكرموا وساعتها قلت إن مصر أكبر دوله حصلت على تكريمات السنادي من مؤسسه SACEM.FR باريس في مجال الموسيقى حتى الفنان محمد منير اللى حضوره نور الحفلة أنا اللى عاملة يونس وياحمام وقلبي ميشبهنيش اللى هما بالمناسبه كلمات الشاعر العظيم عبد الرحمن الابنودي اللى مكانش بيشتغل غير معايا من جيل الملحنين الشباب إيمانا بموهبتي وحققنا نجاحات كبيره جدا الحمد لله سوا، وبالمناسبة هو اللى كاتب عيون القلب اللى اللى لحنها الموسيقار الموجي يعني منير لو كان غنى يونس امبارح كان هيبقى الخال الأبنودي اتغناله عملين في نفس الحفله عيون القلب لحن الموسيقار محمد الموجي ويونس لحن محمد رحيم. 

وأضاف: طيب ولو اتكلمنا عن الليالي المصريه السعوديه والتعاون مابين أكبر بلدين عربيتين في مجال الفن طب وهو فيه تعاون احلى من التعاون اللى حصل بيني وبين الشاعر السعودي الكبير سعود الشربتلي اللى كتب غنوه الوتر الحساس لشيرين وأنا لحنتها وتعبت فيها وبذلت فيها مجهود كبير لحد ما نزلت، والحمد لله حرفيا هي النهارده أغنيه عربيه  عالميه (قولا واحدا) لأن كل جنسيات العالم بيغنوها بالعربي ومواقع التواصل موجوده وتشهد معرفش بس حبيت اسأل يعني. 

وواصل: هو لحد امتى المبدع المجتهد هنفضل نحط من قدره ونقتله معنويا بالشكل ده وهل ده مقصود ولا حدث سهوا وعلى فكره انا بتكلم عموما في المبدأ مش بس الجزء اللى يخصني معرفش ليه  الموقف ده فكرني بغنوه بتاعتي غنتها نانسي عجرم اسمها (في حاجات تتحس ومتتقالش ) بس لما تلاقيها مش بتتحس بتضطر تقولها.  

واختتم: “هو الرجل الأكثر نفوذا هيقعدنا في بيتنا جوه بلدنا كمان ولا إيه”. 

كان محمد رحيم طرح، مؤخرًا، أغنية تحت عنوان الساحل الشمالي، للكينج محمد منير ومريام فارس، وطرحت الأغنية في شهر أغسطس الماضي 2023، وحقق الديو نجاحًا كبيرًا، تخطت على موقع اليوتيوب 8 ملايين مشاهدة، وجاءت كلمات الأغنية: بتعدي عن يميني وتعدي عن شمالي، جننتي البحر كله في الساحل الشمالي، يا أسمر مالك ومالي سيبني أتشمس في حالي، ومتشغليش في قلبي ده أنا قلبي لسه خالي، أنا كنت في حالي ماشي بسأل عمك غباشي، هو المشمش مجاشي قال بس انتوا الحقوه.