«متآمرين وضد البلد».. مصطفى بكري يهاجم “الموظفين الصغيرين” ويطالب بمحاكمة عسكرية لمخزني السلع: حسوا بالناس (فيديو)
بكري: بتخزنوا سلع استهلاكية عشان إيه؟ عشان تحطوا وقود للنار اللي انتو متصورين أنها هتولع في البلد
شن الإعلامي مصطفى بكري، هجوما على من وصفهم بـ”الموظفين الصغيرين” وطالبهم بأن يرحموا الشعب. كما هاجم التجار الذين يرفعون الأسعار، لافتا إلى أنهم متآمرين وضد البلد وهدفهم خلق حالة احتقان لدى الناس، وطالب بمحاكمة كل تاجر يخزن سلعة ما محاكمة عسكرية.
وقال بكري عبر برنامج “حقائق وأسرار” على قناة “صدى البلد” مساء الجمعة: “عايز أقول لكل إنسان وطني على أرض مصر، كل واحد بيحب البلد دي، كل واحد تاريخه وحياته وذكرياته وأسرته وعيلته وبيته وقبره في البلد دي: اتقوا الله في مصر”.
وأضاف: “وبقول لجمهورية الموظفين الصغيرين اللي النهارده اللي رايح يجيبلي.. ادفع فتورة الكهربا كذا كذا.. اعمل مش عارف إيه.. البيت ده لازم يتهد.. فيه إيه؟ ما تلموا نفسكم شويه، الناس تعبانه، حسوا بالناس، والناس دي دمها مصري الوطنية بتجري جواها فالرحمة”.
وواصل: “صغار الموظفين بقولهم الرحمة. ما تقعدش تطلع وتقفلي محلات دلوقتي ولا تقعد تقولي كهرباء لا دلوقتي ولا بكرة، في حاجه اسمها قانون اعرفوا ده كويس قوي، وارحموا الشعب من تصرفاتكم”.
وتابع: والله اللي بيعمل كده ضد الرئيس السيسي.. أي حد بيعمل كده أي حد بيكره الناس أي حد بيعمل حالة احتقان ده لا يمكن يكون انسان وطني حقيقي.. أبدا .. يبقى ده مش مقدر البلد ولا مقدر ظروف الناس فأنا بتمنى مواجهة كل الشلل والعصابات دي لإن الإخوان داخلين في حتت كتير .. متنسوش يا جماعة.. متنسوش إن الإخوان في فترة السنة دخلوا ناس في الكهرباء ودخلوا ناس في الميه ودخلوا ناس في الإذاعة والتلفزيون ودخلوا ناس في حتت كتير، والتربية والتعليم للصبح.. فأحنا عايزين نحد من الناس دي ونراقبها في تصرفاتها ضد البشر.. واحد عنده كذا قرار مش شايف تنفيذه إلا دلوقتي.. أنت بتعمل كده ليه.. أنت عايز إيه من الناس”.
وقال بكري: “واحد بيرفع الأسعار.. أنت ضد البلد أنت متآمر. ياخد الحاجه ويخزنها وانا بطلب من الأجهزة الرقابية أي حد مخزن حاجه يتحاكم محاكمة عسكرية وتطلع الحاجه وتتابع .. أي حد.. اللي بيخزن لي عربيات في مخازن، اللي بيخزن لي سلع استهلاكية.. اللي بيخزن لي الرز اللي بيخزن لي شوية قمح انتجوا، اللي بيخزن لي كذا.. عشان إيه.. عشان تولعوا.. عشان تحطوا وقود للنار اللي انتو متصورين أنها هتولع في البلد… لأ، لكن في نفس الوقت الرحمة بشعبنا”.
وأضاف: “الرحمة وأنت تطبق القانون يا أخ يا موظف يا أنت ولا هو، افهموا الشعب ده وافهموا طبيعته، ده شعب بسيط وطيب ونقي ومش عايز حاجه من الدنيا غير الستر. استروا الغلابة.. واستروا الطبقة المتوسطة.. وبطلوا تتعاملوا على عكس ما يريد رئيس الدولة وبنسمع كلامه وبنشوف إجراءاته شكلها إزاي”.
