كواليس الظهور الثاني لباسم يوسف مع بيرس مورجان.. والإعلامي الساخر يشرح هدفه من الحوار في 7 نقاط 

باسم: حوار هادئ وطويل عن مشكلة معقدة جدا بعيد عن الإفيهات وقصف الجبهات أو استجداء الريتش والمشاهدات 

فيه حاجات كتيرة كان واضح إني مفوتها بمزاجي عشان مافيش وقت أحرق بنزين في نقاشات بيزنطية 

أنا مش داخل عشان “أهزمه” أنا داخل أكلم الناس اللي بتتفرج واللي يمكن ماكانوش سمعوا أي حاجة عننا 

الحقيقة المؤسفة إن لما الناس تبقى مستنية كوميديان يتكلم عن قضية بالأهمية دي فده شئ حزين 

أنا أقل واحد مؤهل إني أعمل كده بس ده موقف وانحطيت فيه وأتمنى تبقى دي بداية لأسلوب تاني للحوار مع الخارج 

كتب: عبد الرحمن بدر 

تحدث الإعلامي الساخر باسم يوسف، عن كواليس اللقاء الثاني بالمذيع البريطاني الشهير بيرس مورجان، حول القضية الفلسطينية، وما يتعرض له السكان في غزة. 

وقال باسم في صفحته على (فيس بوك): حوار هادئ وطويل عن مشكلة معقدة جدا بعيد عن الإفيهات وقصف الجبهات أو استجداء الريتش والمشاهدات، محاولة لايصال صورة وفكر مختلف لجمهور لا يسمع وجهة نظرنا على الإطلاق، أتمنى انه يكون حوار يعيش لفترة مش مجرد شئ وقتي اعتقد الحلقة حتتذاع بكرة 

وفي وقت سابق حقق حوار باسم يوسف مع بيرس مورجان في الـ17 من أكتوبر الجاري، نجاحا كبيرا، وتخطت المشاهدات أكثر من 20 مليونا على موقع يوتيوب، وملايين المشاهدات الأخرى في منصات مختلفة. 

وعن كواليس الظهور قال باسم: أنا دخلت الحوار ده وفي مخي الأهداف التالية:  

1. إني بتكلم مع المشاهد الغربي . هذا المشاهد شايف صورة تانية غيرنا. اللي بيتعرضله غيرنا . قناعاته مالهاش علاقة بالحقيقة اللي عايشينها. فكان لازم أكلمه بلغته وأجيبه ناحيتنا. 

2. إني أثير فضول المشاهد الغربي إني أقول أسماء مصادر هو يدور عليها بعد كده بنفسه ويشوف الحقيقة. 

3. إني أفصل بين الصهيونية والسامية واكشف الناس اللي بتتهمنا بمعاداة السامية وهما اصلا أكثر كارهين ليهم بمافيهم نتنياهو. 

وتابع: 4. إني احكي تاريخ الصراع من الأول خالص وأوريهم إن دي مشكلة أوربية هما رموها علينا. 

5. إني أكشف دولة الفصل العنصري ضد مواطنيها أيا كان أصلهم وأكشف إن موضوع “الدولة الديموقراطية الوحيدة في المنطقة” إنها كذبة كبيرة. 

6. إني أبين كذبهم وأضرب مصداقيتهم قدام الجمهور الغربي. 

7. النبرة بتاعة الحوار لازم تبقى هادية والواحد مش لازم ينجر للاستفزازات. فيه حاجات كتيرة كان واضح اني مفوتها بمزاجي عشان مافيش وقت اني احرق بنزين في نقاشات بيزنطية مالهاش لازمة. 

وأضاف: “أنا كنت باتجنب الوقوع في فخ الخلاف الفاضي لأن ده تكنيك هدفه إنه يخرجك عن شعورك، وتنسى النقط بتاعتك. كنت باسمع كلام أنا مش موافق عليه عشان استثمر الوقت ده في النقط اللي فوق. الحوار ده مش بتاع قصف جبهات وزعيق ونرفزة لأن في الآخر مش عايز أبقى “رجل عربي غاضب” لأن دي الصورة المتداولة” 

ووأصل: “أنا مش داخل عشان “أهزمه” أنا داخل أكلم الناس اللي بتتفرج واللي يمكن ماكانوش سمعوا أي حاجة عننا، أكبر غلطة إنك تخللي (الايجو) بتاعك يقف في السكة عشان في الآخر المهم الكلام عن القضية مش إنك تاخد نقط حوارية مالهاش لازمة”.  

واختتم: “تاني، ده انترفيو للخارج عشان يفضل كمرجع مستقبلي نكلم بيه العالم اللي بره، أنا حاولت أعمل على قد ما أقدر، والحقيقة المؤسفة إن لما الناس تبقى مستنية كوميديان يتكلم عن قضية بالأهمية دي فده شئ حزين جدا، أنا أقل واحد مؤهل إني أعمل كده بس ده موقف وانحطيت فيه وأتمنى تبقى دي بداية لأسلوب تاني للحوار مع الخارج”.