في أعقاب تصريحات السيسي عن الغلاء.. ارتفاع أسعار “شاي العروسة” بالأسواق

كتب – أحمد سلامة

قررت شركة أولاد بدوي المالكة للعلامة التجارية “شاي العروسة”، رفع أسعار منتجاتها بدءًا من يوم الأربعاء 24 يناير.
وحسب ما قال رئيس شعبة المواد الغذائية بغرفة الإسكندرية التجارية، حازم المنوفي، فقد ارتفع سعر الكيلو من شاي العروسة من منتجات الشركة إلى مستوى 225 جنيها بدلا من 195 جنيها قبل الزيادة.
ووصل سعر الكرتونة 12 كيلوجراما (من أصناف 40 جراما و100 جرام و250 جرام) إلى 2700 جنيه بعد الزيادة، وارتفع سعر الكرتونة 20 كيلوجراما من شاي العروسة إلى مستوى 4500 جنيه.
ويأتي ذلك في وقت شهد ارتفاع أسعار العديد من المنتجات، وهو ما أشار إليه عبدالفتاح السيسي، رئيس الجمهورية، حيث قال إن مصر تتعرض لأزمة واحدة تتمثل في الاقتصاد، مضيفا: “إحنا بناكل وبنشرب، وكل حاجة متوفرة لكن غالية، كله يهون عشان البلد، البلاد جنبنا مش عارفين ندخلها شوية دقيق يعملوا عيش ياكلوه”.
وتساءل السيسي، في احتفالية وزارة الداخلية بعيد الشرطة الـ72، اليوم الأربعاء 24 يناير 2024: “حد ممكن يقول الحكومة والدولة تضبط الموقف في الأسواق، طبعًا ليكم حق، لكن اللي بتكلم عليهم دول مواطنين مصريين، لما أكون مصري، وعندي قدرة على الكسب، وأتصور إن المكسب المناسب يكون كفاية”.
وتابع: “عاوز أسجل احترامي للمصريين والله وتقديري ليهم، وكلامي للمواطن الغلبان والبسيط قبل أي حد تاني في الظروف اللي إحنا عايشين فيها، أنا بلف كتير بالعربية وأقابل ناس بسطاء كتير، محدش جه قالي منهم غير ربنا يعينك وربنا معاك، مصر مش أمانة في رقبتي أنا بس ولا رقبة الحكومة، في رقبتنا كلنا”.
وأشار السيسي إلى من الاقتصاديين اقترحوا على الدولة أن تجري عملية انكماش شديد في اقتصادها ووقف المشروعات التي يتم تنفيذها، ولكنه أكد أنه بالعمل يمكن تحقيق موارد أكبر وتحسين الأوضاع الاقتصادية.
وواصل: “دي وجهة نظر ممكن تكون جيدة، لكن أنا بشغّل 5 أو 6 ملايين مواطن، لو أنا هديله فلوس هتبقى 500 أو 1000 جنيه في الشهر، يعني 5 أو 6 مليار جنيه في الشهر، يعني 60 مليار جنيه في السنة، في حين إنه بالشغل بيعمل مبلغ أكبر من كده بكتير وعايش”.
وعلق: «هتقولي بس الدنيا غالية؟ هقولك غالية بس كلنا نقدر نعيش لو نستحمل هنعيش ونكبر ونتجاوز المشكلة، الدول مش بتمشي بالخواطر بل بالسياسات والقوانين والعمل، والأزمة اللي إحنا فيها ليها حلول بس بتعتمد علينا كلنا، إحنا بنجيب عربيات بأربعة ونص مليار دولار في السنة، 2 مليار دولار موبايل في السنة، وإحنا بقينا 106 مليون وكل حاجة متوفرة”.
وفي سياق متصل، دعا السيسي، إلى إطلاق حوار وطني أعمق وأشمل يختص بملف الاقتصاد، مستكملا: “الحوار الوطني كان فرصة جيدة للحديث حول موضوعات سياسية واقتصادية واجتماعية وأمنية، وهو لن يتوقف، وأدعو إلى حوار أكثر عمقا وشمولية”.